L’Axencia de Seguridá Alimentaria encamienta a los veceros pa nun compartir vasu

|
Vasos de sidra

Midíes hixéniques al estremu pa los hosteleros y procuru pa nun compartir vasu pa los veceros. Son los encamientos principales que fai l’Axencia de Seguridá Alimentaria, Sanidá Ambiental y Consumu de cara a frenar l’espardimientu del coronavirus SARS-CoV-2.

A pesar de que, pel momentu, nun hai evidencies de tresmisión alimentaria d’esti virus, l'encamientu apóyase en que los establecimientos hosteleros son llugares de socialización y de contautu estrechu, polo que aconseya disponer de llavamanes dotaos con xabón líquidu y papel d'ensugáu d'un solu usu o secadores automáticos d'aire, tanto pal personal remanador d'alimentos como pal públicu en xeneral. Amás, recuérdase que nun se permite l'usu de xabones en pastilla o toballes de tela.

Al respeutive de los trabayadores d'esti sector, Seguridá Alimentaria recuerda la necesidá d'estremar la hixene na preparación y manipulación d'alimentos, evitar tusir o espirriar sobre los mesmos y llavase frecuentemente les manes con agua caliente y xabón, sobre manera depués d'utilizar los servicios hixénicos, tocar alimentos crudos, basures o oxetos contaminaos, y siempre que les circunstancies asina lo demanden. Coles mesmes, insístese na importancia de llimpiar y desinfestar a diario toles instalaciones y poner tolos medios pa evitar la contaminación cruciada al traviés de les mesmes manes o d'instrumentos, superficies o equipos.

No que respeuta a los veceros, encamienta evitar compartir vasos o instrumentos. Asina, a la hora de beber sidra lo conveniente sería facelo caún nel so propiu recipiente.

Contador Estadistiques