L'Axencia de Consumu sorraya que ye posible reclamar a los bancos los gastos de constitución de les hipoteques

|

El Supremu considera nules les disposiciones qu'imponen al consumidor tolos costos derivaos de la concertación del contratu

L'Axencia de Sanidá Ambiental y Consumu sorraya que, a la vista de l'actual xurisprudencia, los consumidores qu'incurrieren en gastos innecesarios na compraventa d'inmuebles pueden reclamar a les sos entidaes financieres les cantidaes abonaes indebidamente.

Pa ello, habrán presentar un escritu al bancu solicitando la devolución de los fondos pagaos en conceptu de gastos de xestoría, notaría, rexistru de la propiedá y impuestu d'actos xurídicos documentados, xunto con fotocopies de les factures que xustifiquen la reclamación.

Ye frecuente que cuando un consumidor adquier una vivienda na escritura de préstamu hipotecariu figure una cláusula que-y atribuye tolos gastos y tributos derivaos de la constitución de la hipoteca, como los honorarios del notariu y del rexistrador de la propiedá o l'impuestu d'actos xurídicos documentaos.

En munchos casos, estos gastos nun reporten beneficiu dalgunu al consumidor, yá que se trata de garantíes que repercuten nes entidaes financieres que, sicasí, obliguen de cutiu al titular de les hipoteques a facese cargu d'ellos.

La sentencia del Tribunal Supremu de 23 d'avientu del 2015 considera nules por abusives les cláusules qu'imponen al consumidor tolos costos derivaos de la concertación del contratu de resultes de la intervención notarial y rexistral y el pagu de los tributos nos que'l suxetu pasivu ye'l bancu, como asocede en determinaos fechos imponibles del impuestu d'actos xurídicos documentados.

Pa reclamar la devolución d'estos gastos ye necesario, de primeres, revisar la escritura de préstamu hipotecariu —que nun tien de confundise cola de compraventa—, pa comprobar si contién una cláusula qu'atribuya al consumidor la totalidá de los gastos y impuestos derivaos de la constitución de la hipoteca.

En concreto, la cláusula anulada pol Tribunal Supremu establecía que “son de cuenta esclusiva de la parte prestataria tolos tributos, comisiones y gastos causaos pola preparación, formalización, subsanación, tramitación d'escritures, modificación —incluyendo división, segregación o cualquier cambéu que suponga alteración de la garantía— y execución d'esti contratu, y polos pagos y reintegros derivaos del mesmu, amás de pola constitución, caltenimientu y cancelación de la so garantía, siendo igualmente al so cargu les primes y demás gastos correspondientes al seguru de daños”.

Si na hipoteca figura una cláusula asemeyada, puede presentase una reclamación a la entidá financiera, solicitando la devolución de les cantidaes abonaes. Nel casu de que'l bancu refugue la reclamación o nun la conteste nel plazu de dos meses, el cliente tendrá de reclamar la devolución xudicialmente.

Sicasí, ye importante tener en cuenta que los xulgaos nun manifiesten un criteriu unánime a la de determinar cuálos son los gastos concretos que'l bancu tendrá de devolver.

Pa llograr más información, los consumidores pueden dirixise al Serviciu de Consumu del Principáu d'Asturies, a les oficines municipales d'información al consumidor y a les asociaciones de consumidores.

Contador Estadistiques