L'Avilés aguantó al Burgos nel Suárez Puerta (1-1)

L'UP Langreo sentencia la eliminatoria n'A Coruña tres goliar al Silva (0-3).

Salió vivó l'Avilés del choque d'ida de la primer eliminatoria de la fase estatal de la Copa Federación col Burgos. Pese a les baxes y a la delicada situación económica de la entidá, con impagos de 3 meses a la plantiya, el conxuntu avilesín plantó cara al equipu castellanu, cuartu clasificáu del grupu II de la Segunda División B.

Xiel apostó por dellos xugadores del filial y del xuvenil pa la visita del conxuntu de Patxi Salinas, que tamién tiró de fondu d'armariu. Un tantu del ex sportinguista Adama Touré nel minutu 73 adelantaría al Avilés, pero l'allegría duró poco y Pablo, cuatro minutos más tarde, ponía'l definitivu 1-1. Un resultáu que, sicasí, da esperances a los blanquiazules de cara al choque de vuelta n'El Plantío en dos selmanes.

Partíu históricu pal Silva

L'Unión pasó ayeri a la historia del Silva Sociedad Deportiva al ser el primer rival d'esti equipu del barriu d'A Coruña de mesmu nome en partíu oficial a nivel estatal nos sos 77 años d'historia. Sicasí, los gallegos nun pudieron celebrar como queríen esti acontecimientu y vieron como los azulgrana sentenciaben la eliminatoriu con un contundente 0-3.

Hernán Pérez Cuesta reservó a dellos titulares, lo que nun influyó nel rendimientu del equipu. Asina, nel minutu 31 adelantóse nel marcador con un gol d'Urtzi Urcelay, al que siguió ún de Fran No de cabeza nel 69 y otru de Polo a la contra nel 88.