Laura Marcos recoyó'l Premiu Fernán Coronas

En Cadavéu pol poemariu 'Díes otros'.

El XXVI Premiu de Poesía en Llingua Asturiana Fernán Coronas foi pa Laura Marcos. La escritora mierense recoyó'l so gallardón el 25 d'agostu con motivu de les fiestes de La Regalina, qu'entama, al igual que'l concursu, la Sociedad Popular, Recreativa y Cultural La Regalina.

'Díes otros' ye la obra que resultó merecedora d'esti prestixosu premiu que lleva'l nome del Padre Galo –qu'emplegaba l'alcuñu lliterariu Fernán Coronas–, ún de los meyores escritores de la lliteratura asturiana, con una recompensa de 900 euros y la espublización del poemariu. Solinca Turbón foi la ganadora de la edición pasada con 'Reflexones d’un cuerpu opacu', rescamplando tamién na llista de ganadores los nomes de Taresa Lorences, Miguel Rojo, Humberto Gonzali, Marisa López Diz, Ignaciu Llope, Pablo Rodríguez Medina, Susana Rodríguez Sela, Miguel Rodríguez Monteavaro, Xurde Fernández o Inaciu Galán, ente otros.