Laura González echa pelos conceyales del so partíu n’Uviéu

La conseyera de Vivienda y Bienestar Social, l'avilesina Laura González, que yá fixere declaraciones al favor de que'l muséu de los Premios Príncipe d'Asturies se construyere na so ciudá, afirmó ayeri en rellación al asitiamientu d'Izquierda Xunida d'Uviéu contra la construcción del "Centru Cultural Niemeyer" que la postura de l'agrupación uvieina del so propiu partíu nesti asuntu yera de "ceguera dafechu" afirmando que los conceyales d'IX n'Uviéu "nun merecíen tar en política".

La Conseyera, que fizo estes declaraciones nel actu d'entrega de les llaves d'unes viviendes sociales, defendió la rellación del proyectu cola Fundación Príncipe d'Asturies y declaró que "A la Fundación Príncipe, independientemente de qu'un sía republicanu o non hai que reconocé-y que truxo a Asturies a persones internacionales de la izquierda, pero tamién de la derecha, y que nun son nin d'una cosa nin de la otra".

IX d'Uviéu yá afirmare, va agora una selmana, al traviés d'un alcuerdu de la so executiva, que taba en contra dafechu de la construcción del muséu de los Premios Príncipe con cargu a fondos públicos "independientemente d'au s'asitie, pola so falta de conteníu". L'agrupación uvieina d'IX declarare que-y abultaba "un debate engañosu" el que se taba faciendo pol muséu y qu'ello amás alendaba l'evasionismu "de les verdaderes preocupaciones de los asturianos como'l paru, la vivienda, o la crisis económica".

En rempuesta al asitiamientu oficial d'IX d'Uviéu y tres de dellos cruces de declaraciones de líderes d'IX d'Uviéu y Avilés nesti sentíu, con acusaciones mutues ente l'avilesín Fernando Díaz Rañón y el conceyal uvieín d'IX Roberto Sánchez Ramos, Laura González llevó'l debate sobre la construcción del Muséu a un planu ideolóxicu sobre la mesma Fundación Príncipe, declarando que-y quería recordar a IX d'Uviéu "qu'equí tuvo Mandela, tuvieron siete muyeres que defenden nel mundu los derechos de les muyeres, tuvieron Lula y el padre Ferrer y, en definitiva, muncha xente nos que, caún de los que somos d'izquierda, tendríemos d'adorar ".

Laura González dixo que la polémica por onde había facese'l centru Niemeyer nun tenía xacíu y defendió que se construyere n'Avilés como una compensación a la ciudá pola reconversión de la siderurxa.