Laura Álvarez Fernández y Tino Álvarez Menéndez, ganadores del V 'Indumentaria' nel Día'l Traxe'l País

|
Ganadores del V Indumentaria nel Día'l Traxe'l País

Grau vivió otra vuelta’l Día’l Traxe’l País, nel que bon tiempu ayudó a que se pudieran llucir los paxellos. Los ganadores de la quinta edición del concursu 'Indumentaria' foron Laura Álvarez Fernández y Tino Álvarez Menéndez, y el públicu asistente pudo contemplar una camisa de muyer de llinu del sieglu XIX atopada n’Anzu.

La pasarela instalada ayeri frente a la capiella de Los Dolores vio pasar destacaos exemplos de vistimienta tradicional d’esa dómina. Propuestes diferentes y mui personales que sirvieron d’amuesa de traxe tradicional asturianu, al qu’esti concursu pretende poner en valor.

Enantes hebo tiempu pal recuerdu de les persones que nos llevó una pandemia qu’impidió tamién de la celebración del Día’l Traxe’l País l’añu pasáu, y los presentes vieron dos prendes d’un importante valor. Foron una camisa de muyer de llinu del sieglu XIX atopada n’Anzu por Xosé Antón Fernández ‘Ambás’ y Ramsés Ilesies, y un xustiyu del mesmu tiempu de la coleición de Cos Mendendez procedente de Sama Grau.

Recompensa a los trés primeros

El xuráu formáu por Consuelo Riu, Amadéu Benavente, Constantino Menéndez y Héctor Díez, decidió que los merecedores del primer premiu de 'Indumentaria', con una recompensa de 200 euros caún y unes lligues de diseñu a costafecha, a Álvarez Fernández y Álvarez Menéndez. El segundu llugar foi pa María Vázquez Álvarez y Plácido Rodríguez Fernández, polo que lleven 150 euros, y el terceru pa Gema Martínez Rodríguez y Inaciu Iglesias, que reciben 100.

El día finó con un gran baille na Plaza’l Mercáu nel que tocaron Leticia Baselgas y el grupu Andecha Folclor d’Uviéu, amás d’Ambás y Ilesies. Nel mesmu tomaron parte pareyes de Xeitu, Trebeyu, Vezos Astures, Andecha Folclor d’Uviéu, Fitoria y San Félix.

Na imaxe superior, Álvarez Fernández y Álvarez Menéndez, los ganadores, con Vázquez Álvarez y Rodríguez Fernández a la izquierda y Martínes Rodríguez y Iglesias, a la derecha; na inferior, la camisa de llinu atopada n'Anzu y cedida pola familia propietaria pa exhibila nel concursu. Semeyes obra d'Ojos de Hojalata Fotógrafos.

Contador Estadistiques