L’Aula Magna de la Universidá d’Uviéu acueye’l pieslle de la UABRA

La novena edición de la Universidá Asturiana de Branu (UABRA) celebróse del 30 de xunetu al 10 d’agostu en Cangas del Narcea con un centenar d’alumnos matriculaos en dalguna de les posibilidaes formatives qu'ufierta. L’actu que sirve de pieslle oficial de los cursos de l’ALLA va celebrase nel Aula Magna de la Universidá d’Uviéu.

Va ser mañana, a les 19 hores, y nel mesmu les persones que consiguieron aprobar na UABRA van recibir los sos certificaos y diplomes correspondientes de manes de les autoridaes presentes nel eventu. Asina, van tar presentes y van tomar la pallabre nel actu María Cristina Valdés, direutora de la UABRA; Santiago García Granda, rector de la Universidá d’Uviéu; Xosé Antón González Riaño, presidente de l’Academia de la Llingua Asturiana (ALLA); Fernando Padilla, direutor xeneral de Planificación Llingüística y Normalización; y Laura Álvarez García, teniente d’alcalde de Cangas del Narcea.

Más de 150 persones participaron mientres dos selmanes nos cursos y xeres complementaries entamaos cola Escuela-Hogar de la villa como epicentru principal. El programa formativu d’esti añu ufiertó’l Cursu Elemental de Llingua Asturiana, el Cursu Avanzáu de  Llingua Asturiana y la segunda fase del Curso de Capacitación en  Gallego-asturiano, amás d’ otros cuatro dientro de la estaya ‘Cursos d’Afondamientu Cultural y Llingüísticu’: ‘Capacitación pa la Traducción al Asturianu’, ‘Competencies dixitales na  Educación’, ‘Xestión Cultural n’Asturies: creando cultura a traviés de los medios’ y ‘Asturies ente’l sieglu XX y XXI: tresformaciones sociales y culturales’.