L'Audiencia Nacional refuga poner en llibertá a Otegi

L'Audiencia Nacional refugó poner en llibertá a el ex voceru de Batasuna Arnaldo Otegi, al considerar que'l "devenir políticu de los acontecimientos” argumentáu pola so defensa y la so postura política nun van condicionar al tribunal.

L’Audiencia Nacional tachó de "oportunista” la postura política d’Otegi na que defendía víes namás que pacífiques y dixeron que los planteamientos "de nenguna forma afecten nin van condicionar a esti tribunal".
  
Asina consta nun autu dictáu pola Estaya Cuarta de la Sala de lo Penal que refuga'l pidimientu formuláu pola defensa d'Otegi y avala'l planteamientu de la Fiscalía, qu'argumentó que'l dirixente abertzale vulneró les midíes cautelares que se-y impunxeren al viaxar a Francia pa reunise con miembros d'ETA.
  
Más d’un añu de cárcel
Otegi ta na cárcel dende'l 16 d'ochobre del 2009 por orde del xuez Baltasar Garzón, que-y imputó de primeres, xunto al ex secretariu xeneral de LAB Rafael Díez Usabiaga y otros seis dirixentes de la izquierda abertzale, l'intentu de reconstruyir Batasuna al traviés d'un proyectu col que pretendíen crear "un referente políticu" que pudiere acudir a les elecciones municipales y forales del 2011.