L’ATNL critica “la falta de compromisu pa cola normalización” de la direición xeneral

La non espublización entovía de les subvenciones a entidaes llocales pa la normalización social del asturianu y gallego-asturiano lleva a los SNL a una situación abegosa. L’ATNL critica “la falta de compromisu” de Planificación y Normalización Llingüística y alerta de l’arrenuncia de dellos conceyos a proyeutos previstos.

“Nada nun se sabe de lo relativo a subvenciones pa entidaes llocales pese a recoyer la convocatoria publicada nel BOPA del 24 d'agostu del 2017, que recoyía a la so vez la resolución de 9 d'agostu del 2017, de la Conseyería d'Educación y Cultura, pola que s'aprobaba la convocatoria de subvenciones pa les entidaes llocales del Principáu d'Asturies nel añu 2017, llinia 5: normalización social del asturiano y gallego-asturiano en réxime de concurrencia competitiva”, que tenía un plazu máximu pa resolver “de trés meses a contar a partir del día 13 de setiembre, fecha na qu'acababa'l plazu pa presentar solicitúes”, rellata l’Asociación de Trabayadores de la Normalización Llingüística (ATNL). Una manera de proceder que, según espliquen, “provoca trestornos graves nos conceyos, que na mayoría los casos zarren l'exerciciu a metá del mes actual, polo que resulta difícil dar consecución a los proyeutos plantegaos en base a una financiación que nunca nun paez llegar”.

Asina, asegura que son dellos los conceyos que van arrenunciar a proyeutos al resultar difícil dar consecución a los plantegaos "en base a una financiación que nunca nun paez llegar", a lo qu'hai que sumar, "por si nun fora abondo disuasoria", la cantidá que se destina a los de toda Asturies: "40.000 euros". Poro, l’ATNL denuncia “la falta de compromisu pa cola normalización social del asturianu de la Direición Xeneral de Planificación y Normalización Llingüística que, a piques de cerrar l'añu, foi incapaz de proporcionar un refuerzu económicu tan importante a los conceyos asturianos, torgando, una vez más, que los servicios algamen unos oxetivos más que necesarios de normalidá nos sos territorios respeutivos”.

Pa finar, los trabayadores de los SNL recuerden la importancia d’estes ayudes pal desendolcu del so trabayu pola falta, en munchos casos, “de recursos propios sobre los qu'actuar plantegando campañes que redunden nuna promoción eficaz de les nuestres llingües, l'asturianu y el gallego-asturiano”.