L'Athletic Club recibió a l'afición del Sporting en San Mamés n'asturianu

La entidá bilbotarra emplegó la llingua asturiana per megafonía y na videopantalla esterna de San Mamés, onde los xixoneses sumaron una derrota nueva (2-1).

El millar d'aficionaos del Sporting que s'averaron ayeri a Bilbao recibieron una sorpresa agradable. La videopantalla de la fachada del campu del Athletic Club recibíalos con un mensaxe en trés llingües: la llariega, la castellana y l'asturiana. Asina, podía lleese 'Ongi Etorri', 'Bienvenidos' y 'Afayáivos'.

L'emplegu del asturianu, que n'El Molinón ye inesistente dafechu, nun quedó ehí. Per megafonía recibióse a los siguidores del Sporting tamién en llingua asturiana y emplegóse esti idioma a la hora d'anunciar los cambios.

Primer derrota de Rubi

No deportivo, el conxuntu roxiblancu volvió de vacíu tres remontar l'Athletic un 0-1 tres un penalti cometíu por Bóveda sobre Čop que materializó'l croata nel minutu 27. La lesión nel 35 de Babin, que tien una posible rotura muscular, obligó a Rubi a improvisar con Xavi Torres de central, que sufrió enforma nuna posición desconocida pa él. El catalán descartó sacar a Lora y colocar a Lillo nel puestu del martinicu, siendo Sergio Álvarez, sorprendente suplente, l'escoyíu na sustitución.

Fruto d'esa falta d'adaptación al puestu llegó l'empate de Munian nel 49, cuando'l navarru ganó'l llombu al alicantín tres una gran asistencia de Williams. Tornaría a ser protagonista'l rápidu estremu llocal nel 68, cuando recibía un toque innecesariu de Moi Gómez, nuna xugada ensin peligru nengún, que nun pasó desapercibíu pa Clos Gómez. Aduriz convertiría la pena en gol.

Dende esi momentu, el Sporting quixo y nun pudo, con un Athletic qu'emplegó l'otru xuegu consiguiendo que'l reló corriera ensin peligru pa la portería defendida por Iraizoz. Con esti resultáu'l Sporting sigue en decimoctava posición, a 5 puntos de la permanencia, que marca'l Leganés.