L'Asturies Revolution Tour 2016 arranca en Llangréu dientro la Feria de la Cerveza Artesano

|

Dixebra y Fe de Ratas abren esti sábadu el so calendariu de conciertos conxuntos nuna cita na que van compartir escenariu con Skontra y Lendakaris Muertos, ente otros.

La 'I Feria de la Cerveza Artesano-Asturiana' va consistir en trés díes de folixa alredor d'esti productu n'espoxigue nel país, onde la música va compartir protagonismu con esta bébora. L'actividá, encuadrada nuna serie d'iniciatives baxo'l nome de Llangréu Cultural, va desendolcase nos Xardinos de la Pinacoteca del Conceyu 'Eduardo Úrculo' con entrada de baldre y va principiar esta tarde, a partir de les 19 hores, cola intervención de la Banda Gaites Conceyu de Llangréu, y, darréu, de la Banda Gaites Villa de Mieres.

A les 22 hores tán previstos los primeros conciertos, nos que va actuar la revelación del momentu na música asturiana, Rodrigo Cuevas, xunto cola Celerina Sound System. Tamién ta previsto'l debú de los grupos de l'Asociación Músicos del Nalón, Voodoo Grass, Orpín y Lumberjack.

Punk y rock

El sábadu l'actividá na carpa va principiar al meudía con canción asturiana a cargu del Coru Santiaguín y L'Enguedeyu. Yá de tarde, a partir de les 20.30 hores, llegará'l turnu del punk y del rock colos castellanos SeiSKAfés, Skontra, Cats Attack, los navarros Lendakaris Muertos y Dixebra y Fe de Ratas, nel que va ser el primer conciertu del Asturies Revolution Tour del 2016 tres les bones esperiencies de Lleón y Uviéu na seronda pasada.

Nesta propuesta conxunta, dambes bandes con orixe n'Avilés presenten un espectáculu conxuntu de trés hores de llargor qu'abre Fe de Ratas pa depués dar pasu a Dixebra, con delles collaboraciones de músicos de los dos grupos, pa terminar con una traca final con tolos componentes de dambes formaciones sobre l'escenariu. Amás, esti conciertu tamién va servir pa la estrena de Javier Tejedor como nueu 'dixebriegu', músicu que va tocar la gaita y l'acordión estos meses próximos mientres l'ausencia de Llorián García por mor d'una estancia nos Estaos Xuníos del gaiteru.

Por último, el domingu, día caberu de la feria, ta prevista l'actuación de la Banda Música de Llangréu, Los Asturianos y Trisquel dende'l meudía.

 

Contador Estadistiques