“L’asturianu y la toponimia nun se pueden utilizar pa xenerar falsos conflictos y dividir”, reclama Galán

|
Inaciu Galán en Sotu'l Barcu con Francisco Javier García Rodríguez

L’equipu de gobiernu municipal de Sotu’l Barcu recibió’l sofitu d’Iniciativa pol Asturianu depués de les amenaces que llevaron a la convocatoria d’un Plenu estraordinariu p’aprobar una moción na que se pide recuperar los topónimos derogaos nel 2017. Inaciu Galán rescampló que “l’asturianu y la toponimia nun se pueden utilizar pa xenerar falsos conflictos y dividir a la sociedá”.

El vocal de Rellaciones Institucionales d’Iniciativa pol Asturianu encabezó la comitiva de la organización que visitó’l sábadu la Casa Conceyu “pa treslladar l’ánimu” de la organización “dempués de les amenaces recibíes pa camudar la toponimia tradicional y oficial dende 2017”. El vienres l’alcalde Jaime Menéndez Corrales facía públiques nel Plenu convocáu a costafecha pal asuntu de la toponimia del conceyu les presiones vivíes, que tocaben tamién a la so familia, que llevaben a la Candidatura Independiente Concejo de Soto del Barco (CISB) a camudar el so votu y apoyar xunto col PP, cola astención del PSOE, la reclamación de la vuelta de los topónimos dereogaos hai 4 años pa contar toos ellos con una forma billingüe que, precisamente, la llei nun permite sacante esceiciones mui concretes nel que la forma castellanizada tenga munchu puxu.

Galán recordó que la forma deturpada que se quier recuperar nel casu de L’Arena, esto ye, el términu 'San Juan de La Arena', nun ye tradicional y data de 1989, y señaló que “l’asturianu y la toponimia tradicional nun se pueden utilizar pa xenerar conflictos falsos y dividir a la sociedá asturiana, y tampoco pueden normalizase de forma aisllada; ye importante acompañar la recuperación de la toponimia de campañes de sensibilización y un usu rigorosu per parte de les alministraciones, siendo exemplares nel cumplimientu de la toponimia oficial”. D’igual forma fai un llamáu a la Conseyería de Cultura, Política Llingüística y Turismu “pa qu’esti tipu de situaciones nun vuelvan a ocurrir”.

Na semeya, Galán nel aconceyamientu col conceyal y teniente d'alcalde Francisco Javier García Rodríguez y otros miembros del equipu de gobiernu.

Contador Estadistiques