L’asturianu va tar presente nesta edición de la FIDMA

|
L’asturianu va tar presente nesta edición de la FIDMA

Iniciativa pol Asturianun va tar presente na LXI Feria Internacional de Muestres d’Asturies (FIDMA) con un stand nel que van tener espaciu seis empreses comprometíes pa col idioma. La cita, qu’atraxo a 714.424 visitantes al recintu ferial Luis Adaro l’añu pasáu, comienza’l sábadu y termina'l día 20.

La intención del coleutivu que trabaya pola normalización de la llingua asturiana ye dar visibilidá y presencia al asturianu nel ámbitu socioeconómicu a lo llargo de les más de dos selmanes que dura l’eventu, pa lo que quixo compartir el so espaciu con empreses comprometíes pa col idioma. Asina van tener güecu nel stand trés editoriales, Ediciones Trabe, Saltadera y Pintar-Pintar; una empresa d’animación, Trebeyos; la tienda-marca de productos de regalu Miguina de Pan; y una productora audiovisual y de márketing, CuatroGotes Producciones.

“Les seis empreses presentes nel stand tienen un reconocíu compromisu col usu del asturianu y son parte del texíu empresarial que vien trabayando dándo-y normalidá al asturianu nos sos ámbitos”, esplica la organización nun comunicáu. “Pa Iniciativa pol Asturianu esti ye un pasu perimportante, yá que vamos consiguir una visibilidá que nunca enantes fuera posible pa nós, tando nun eventu pel que pasen cásique tolos asturianos y asturianes, amás de miles de turistes que tán n’Asturies per estes feches”, esplicó Inaciu Galán, presidente del coleutivu.

“Compartir l’espaciu con estes empreses va permitir que tengamos una imaxe de normalidá énte la sociedá, asina como que se visibilice que l’asturianu ye una ferramienta que non solo ye un patrimoniu cultural, sinón tamién una ferramienta que crea empléu y xenera riqueza”, añadió. Nel stand van tener tamién espaciu los proyeutos de comunicación Iniciativa pol Asturianu nes ondes y Alderiques d’Asturies.

Amás van entamase mientre estes dos selmanes actividaes, sorteos, firmes de llibros, xuegos tradicionales y otres iniciatives que van animar la presencia de la organización y les empreses na FIDMA.

Contador Estadistiques