L'asturianu Rubén Alba gana'l Macallan

Como vos prometimos ayeri, ya tenemos los resultaos de la decimoséptima edición del Macallan, que gano'l gaiteru avilesín Rubén Alba.La gaita asturiana vuelve a ganar esti importante troféu gracies a esti gaiteru, que pa muncha xente yera'l que más posibilidaes tenía de ganalu de los cuatro representantes asturianos. El sistema de puntuación ye de tres xuraos, un asturianu, otru gallegu y unu bretón, depués, combinando les puntuaciones de cada xuráu, dase la posición final. La puntuación que recibió'l ganador foi, primer puestu pal xuráu asturianu, sestu pal xuráu gallegu y primeru tamién pal xuráu bretón. Sorpriende la diferencia de la puntuación del xuráu gallegu con respeuto al de los otros dos xuraos, na que, según nos cuenta'l nuestru corresponsal, foi una actuación de bon nivel, destacando'l complicáu, pero casi obligatoriu nesti tipu de concursos, Floréu de Remis. En segundu llugar quedó'l gaiteru gallegu Daniel Bellón, que recibió les puntuaciones de quintu pal xuráu asturianu y segundu pal gallegu y bretón. En tercer puestu'l tamién gallegu Pablo Seoane, sestu pa los asturianos, primeru pa los gallegos y cuartu pa los bretones. El tercer puestu ta compartíu por dos gaiteros asturianos, Iván González y Iñaki Sánchez, casu curiosu ye la puntuación que recibió Iñaki Sánchez, segundu pa los asturianos, ¡séptimu! pa los gallegos y terceru pa los bretones. L'otru representante asturianu Milio Martínez quedó en sestu puestu, coles puntuaciones de cuartu pa los asturianos, octavu pa los gallegos y quintu pa los bretones.A parte del primer puestu de Rubén Alba, hai que reconocer el bon llabor del restu de la delegación nel Macallan. Ente la delegación gallega amás del segundu y tercer puestu, hai que destacar a Pedro Álvarez, qu'anque quedó n'últimu puestu, ye un gaiteru que con namás que trece años ya participó nel so primer Macallan.Agora al ganador queda-y una axenda bien apretada no que queda de festival en toa una riestra de muestres. El restu de la delegación asturiana entamen a actuar, "La Señardá " entamó esti sábadu pela mañana, y "Corquiéu" actuen mañana pela nueche. La banda de gaites "Llariegu", amás de les actuaciones normales, van participar nel concursu de percusión pa bandes de gaites "Beamish d'Ensemble de Batteries", nel que so día participó "La Viga Travesá".