L'asturianu nun ye oficial…

Esti titular, que paez una tautoloxía boba, tresformase nuna realidá bien doliosa cuando l'estáu echa mano d'ella pa seguir poniendo pilancos nel camín de la escolarización del asturianu.

La retafila d'ataques contra l'idioma asturianu yá paez una campaña organizada tres la decisión del Conseyu d'EstáuEl Conseyu d'Estáu emitió un informe nos últimos díes del añu pasáu nel que refuga la pretensión de la Viceconseyería d'Educación d'homologar l'asignatura d'asturianu al restu de materies, en Primaria y en Secundaria.

L'Alministración autonómica, en cumplimientu de la Llei d'Usu, anunció la xeneralización de la ufierta de l'asignatura a tola educación Primaria pa esti añu y a la Secundaria más alantre, lo que suponía un pasu dende l'actual situación de voluntariedá precaria.

Asina mesmo, col profesoráu correspondiente pasaba a crease una "plantilla" específica d'esta materia de conocimientu, polo que na educación asturiana habría una especialidá específica de Llingua Asturiana. Nel so informe, el Conseyu d'Estáu echa mano de la falta de reconocencia llegal del asturianu como llingua oficial nel ámbitu autonómicu asturianu, o lo que ye lo mesmo, por nun apaecer nel Estatutu d'Autonomía como llingua oficial y señala que "en nengún casu el Principáu ye quien pa proceder a la creación d'esa especialidá, desque la LOGSE establez que la creación d'especialidaes tien qu'aprobala l'Estáu previa consulta coles comunidaes".

L'Academia de la Llingua, per boca de González Riaño, llamentó l'informe y encuadrólu dientro "d'una fola d'agresiones sistemátiques contra l'asturianu" y recordóse que la Conseyería nun se quixo implicar muncho na defensa de l'asignatura, a pesar de les declaraciones, porque'l Principáu tien competencies esclusives nel usu del idioma y tien un informe xurídicu favorable fechu pol Departamentu de Derechu Almministrativu de la Universidá que diz que la Llei d'Usu y l'estatutu son "ferramientes llegales abondes p'afitar la presencia de la llingua asturiana na escuela pública". La Conseyería quería "consolidar" la asignatura equiparando la situación del profesoráu pa que pudieren optar a destinos definitivos con concursos de tresllaos, pero esto nun va ser posible, como quiciás tampoco la hipotética convocatoria pública de places por concursu-opsición.

El Conseyu d'Estáu d'Educación (MEC) diz tamién que lo único posible sigue siendo la ufierta cola condición d'asignatura voluntaria, sulliñando que la so decisión ye "vinculante y de cumplimientu obligáu" por parte del Principáu. Otres reacciones vinieron de la estaya d'ensiñanza del sindicatu UGT y d'IX, que clamiaron pola intervención del Parlamentu asturianu. El portavoz d'esti grupu políticu na Xunta, García Valledor declaró que queda claro la insuficiente regulación que supón la Llei d'Usu al ver les agresiones continues al idioma dende dellos ámbitos oficiales y particulares, polo que propón volver a una reforma del Estatutu pa qu'esti apañe'l reconocimientu de la cooficialidá, al mesmu tiempu que pide pa ello un diálogu sensatu y lleal de les fuerces polítiques pa consensuar los conteníos de la declaración d'oficialidá.