L'asturianu nun ye a caltriar nos usuarios de les biblioteques

Los llibros y discos n'asturianu tán a muncha distancia de la publicación editorial y discográfica en castellanu ente les preferencies de los usuarios de les biblioteques asturianes. Datos oficiales de la rede de biblioteques públiques d'Asturies espeyen como la obra de lliteratura n'asturianu más lleida nos seis primeros meses del añu, "En busca de Xovellanos" d'Ismael María González Arias, rexistró 11 empréstamos nos seis primeros meses d'esti 2007.

Na metada d'esi tiempu, trés mesesla novela ganadora del Premiu Planeta "Todo bajo el cielo" de Matilde Asensi, rexistró 96 empréstamos.

Independientemente de les causes que lleven a esta situación, que van dende la mayor promoción editorial a la dificultá que tien gran parte del públicu pa lleer n'asturianu, los datos de la rede de biblioteques espeyen como la lliteratura n'asturianu sigue teniendo un papel mui secundariu ente les preferencies de los llectores asturianos. Na llista de les 10 obres más lleides na nuestra llingua nel primer semestre del 2006, les más d'elles asoleyaes pola casa "Trabe" apaecen títulos como "Carretera ensin barru" de Naciu Varillas o "La Banda Sonora del Paraísu" de Xandru Fernández, dambos con 6 empréstamos, lo que fai una media d'ún empréstamu al mes. Son datos a muncha distancia de los que rexistren los grandes llanzamientos editoriales en castellanu, que tienen una media de más de venti empréstamos al mes.

No tocante a discos, la música n'asturianu presenta meyores númberos, anque a distancia de les obres musicales n'inglés o castellanu que gocen tamién del sofitu d'una industria discográfica y d'un encontu nos medios de comunicación que nun esfruten les producciones n'asturianu. "Ensin Novedá" del grupu Dixebra, salió 6 vegaes de les biblioteques asturianes nel primer semestre del 2007, lo que fai una media de 10 empréstamos mensuales, la metada que grupos como "Dover" o "Evanescence" que llogren unos venti empréstamos mensuales. Sicasí, el casu de Dixebra ye una rareza: los demás discos qu'apaecen ente los más emprestaos nes biblioteques, ente ellos el "Música na maleta" de Tejedor, "Revolución celta" de Fardaxu o "Güeria" de La Col.lá Propinde anden pelos cinco empréstamos al mes.