L'asturianu na educación, preocupación de los comisarios europeos

Una delegación de comisarios europeos del comité de la Carta Europea de Llingües Rexonales, documentu suscritu pol Estáu Español en 1992, fizo la otra selmana una ronda de consultes pel norte d'España, visitando Navarra, Euskadi, Asturies y Galicia pa conocer de primer mano la situación de les respectives llingües minorizaes d'estos territorios.

Iguada la delegación por Stefan Oeter, Philip Blair, Vesna Cmic-Grotic, Antonio Bultini y Alberto Pérez Calvo, l'axenda de los comisarios europeos n'Asturies incluyó entrevistes cola Academia de la Llingua Asturiana, la Xunta Pola Defensa de la Llingua Asturiana, la organización de defensa del gallego-asturiano Xeira y los responsables de Política Llingüística Carlos Madera y Ramón d'Andrés.

La primera de les entrevistes tuviéronla los comisarios cola Academia de la Llingua. La presidenta de l'Alla Ana Cano y el secretariu de la entidá, Roberto Quevedo esplicaron que la delegación demostró un interés por conocer de primer mano la situación llegal del asturianu y sobre les posibilidaes qu'ufierta la llei d'usu del asturianu, l'usu del asturianu nes alministraciones, medios de comunicación y tolo referío a la implantación de la llingua nel sistema educativu.

Esti mesmu interés pol sistema educativu demostráronlu los comisarios na so entrevista cola Xunta Pola Defensa de la Llingua, cola que la conversación foi alredor de trés exes temáticos: la enseñanza, la cuestión de la toponimia, sobre la que la Xunta denunció énte los comisarios l'incumplimientu de la llei d'usu, y l'usu del asturianu nos medios de comunicación, interesándose tanto pol panorama de medios de comunicación n'asturianu como pol tratamientu del asturianu nos medios en castellanu. Sobre la cuestión educativa, los comisarios amosaron especial interés por conocer tolo relativo a la condición y accesu a la función docente n'asignatura de llingua asturiana.