L'asturianu entra per primer vez a les subvenciones a la creación lliteraria del Ministeriu de Cultura

Hasta agora namái podíen acceder obres "escrites en cualesquier de les llingües oficiales d'España", afitaben les bases del 2023.

El ministru de Cultura, Ernest Urtasun, comunicó na Conferencia Sectorial de Cultura celebrada esta mañana nel avilesín Centru Niemeyer que nos díes próximos va remitir a les autonomíes el testu de la convocatoria de ‘Ayudes pa la Creación Lliteraria’ qu'entama la Direición Xeneral del Llibru, del Cómic y de la Lectura. Según apunten dende'l ministeriu, estes subvenciones van tar destinaes, amás d'a les llingües oficiales, "también a aquelles que tengan reconocimientu xurídicu nos estatutos d'autonomía como ye l'asturianu".

Ye la primer vez que los autores en llingua asturiana van poder acceder a esta ayuda, que caltién una partida de 500.000 euros. Les bases del 2023, por exemplu, afiten que les obres "habrán tar escrites en cualesquier de les llingües oficiales d'España nes modalidaees de narrativa (novela, novela curtia y rellatu), poesía, lliteratura infantil y xuvenil, cómic y novela gráfica, ensayu, teatru, traducción y ilustración". 

"La pluralidá llingüística d'España ye una riqueza y esti ministeriu ta comprometíu con ella", apuntó Urtasun n'Avilés a los diferentes conseyeros de Cultura de les autonomíes.