L’asturianu desapaez de paneles informativos de carreteres de titularidá autonómica

La sustitución de paneles informativos nes cuenques conlleva la desapaición del asturianu nos mesmos al emplegase namái'l castellanu. Iniciativa pol Asturianu presentó una reclamación énte la conseyería por "esti pasu atrás" y el so responsable Alejandro Calvo respondió en X.

Dellos vecinos de los conceyos de Llangréu y Mieres punxéronse en comunicación cola organización pa dar a conocer esta situación qu'Iniciativa pol Asturianu asitia nun comunicáu na carretera AS-249 y que podría repetise n’otros llugares al caltener la mesma uniformidá los dos cartelos: forma rectangular, color verde, l’escudu del conceyu y el testu ‘Concejo de’ xunto col nome del mesmu. Nesti casu concretu ‘Concejo de Langreo’ y ‘Concejo de Mieres’.

Dase’l casu amás de que nel de Llangréu apaecía un saludu billingüe en castellanu y asturianu xunto col escudu. Iniciativa pol Asturianu “considera llamentable que se dean estos pasos atrás na visibilización y normalización de la toponimia oficial y de la llingua asturiana”, y esixe una rectificación a los conseyería y “reclamaciones oficiales” a los conceyos respeutivos.

El conseyeru de Fomentu, Cooperación Llocal y Prevención de Quemes respondió en castellanu na rede social X a una entruga del presidente de la organización, Iván Llera, que "la renovación de la señalización faise en función del so deterioru y incorporando la toponimia oficial nesi momentu. En tou casu consultaré el casu concretu".

La renovación de la señalización se realiza en función de su deterioro e incorporando la toponimia oficial en ese momento.
En todo caso consultaré el caso concreto.

— Alejandro Calvo (@AlejandroJCalvo) April 2, 2024