L'Asociación Mujeres Jóvenes de Asturias retoma la campaña #VeraneoConSalud

El sábadu entama un monólogu dientro la campaña de sensibilización 'No seas presa de la talla' nel xixonés Bar Páramo.

#VeraneoConSalud ye una aición enmarcada nel proyeutu 'No seas presa de la talla'  "onde trabayamos en contra del paradigma de belleza dominante, el bombardéu cola 'operación bikini' y la supuesta perfeición de los cuerpos que nun faen otra cosa qu'alimentar ideales de belleza inalcanzables que nos somorguien en problemes de refugu personal y baxa autoestima, sobre manera a les moces, que sufrimos esta tiranía especialmente y que nos ta enfermando", espliquen dende l'Asociación Mujeres Jóvenes de Asturias. La campaña, que se desendolca a nivel estatal coordinada pola Federación de Mujeres Jóvenes, consiste nel repartu de servilletas per dellos locales d'Asturies, la difusión d'un videu en YouTube y la presencia en redes sociales al traviés de delles etiquetes.

Amás l'Asociación Mujeres Jóvenes de Asturias fai un llabor constante en colexos y institutos en pro de l'aceptación personal, en contra del machismu al rodiu'l cuerpu femenín y nel cuestionamientu críticu de los medios de comunicación al respeuto d'esti tema mientres tol añu. Esta temática va ser tamién sobre la que va xirar el monólogu que va protagonizar l'artista feminista Minerva Álvarez esti sábadu, a les 20 hores, nel Páramo, bar asitiáu nel barriu de Ciares.