L’Asociación Grana n’alcordanza de Yolanda Huergo arranca la so actividá coles xornaes ‘(Sobre)vivir n’Asturies’

Esti vienres y sábadu van desendolcase en Xixón les xornaes ‘(Sobre)vivir n’Asturies. Presente y futuru del territoriu y la so población’, primer actividá pública de Grana. Fundada por collacios y compañeros de militancia de Yolanda González Huergo, busca crear espacios de reflexón y esparder la forma de ver el mundu de la xixonesa.

Foi nel mes de setiembre cuando se presentaba esta asociación, que cuenta con Iris Díaz como presidenta, Pablo Rodríguez como secretariu y el so compañeru, Rubén Fernández Ardura, como ayalgueru. Ente los primeros oxetivos pa caltener la memoria d’Huergo, l’entamu d’unes xornaes y la creación d’un premiu d’investigación en llingua asturiana.

L’actividá inaugural yá ta equí cola intención de tratar “la forma y repartu de los recursos n’Asturies, la ordenación del territoriu y la evolución del repartu poblacional”, cola intención de "valorar, nun espaciu de debate y reflexón, cómo los planes y los debates actuales sobre los desarrollos urbanísticos, la evolución demográfica, el despoblamientu de les ales y los planes de desenvolvimientu económicu van condicionar el futuru d’Asturies". Va arrancar mañana, a les 19 hores na sala de conferencies del Antiguu Institutu, cola conferencia 'Un casino en plena selva. La ordenación del territoriu n’Asturies' a cargu d’Ícaro Obeso, profesor del Departamentu de Xeografía de la Universidá d’Uviéu.

Les xornaes, con accesu de baldre, van siguir al día siguiente pela mañana, a les 10.30 hores, con una conversación ente l'arquiteuta urbanista Laura López y Sebastiá Jornet, arquitectu urbanista en Jornet Llop Pastor y profesor del Departamentu d’Urbanismu y Ordenación del Territoriu de la Escuela Técnica Superior d’Arquitectura de Barcelona, baxo'l títulu ‘Territorio: asignaturas pendientes’. Pa finar, va entamase a les 12.30 hores la mesa redonda 'Visiones d’Asturies', na que van intervenir Manuel Maurín, profesor del Departamentu de Xeografía de la Universidá d’Uviéu; Mariana Borissova Boneva, arquiteuta urbanista n'Urbania 2003 y vocal d’Urbanismu del Colegio Oficial de Arquitectos de Asturias; Francisco José Llera Ramo, caderalgu de Ciencia Política de la Universidad del País Vasco/Euskal Herriko Unibertsitatea (UPV-EHU) y direutor del Euskobarómetro; y Ignaciu Llope, psiquiatra y miembru de la Fundación Belenos.

Semeya de Podemos Xixón.