L'asociación de normalizadores critica la tardanza na creación del SNL d'Uviéu

L'Asociación de Trabayadores de la Normalización Llingüística (ATLN)  muestra'l so pesar pola tardanza na  creación d'un serviciu de normalización llingüística  dignu nel Conceyu d'Uviéu.

Fai unos meses aconceyáronse colectivos de la defenta de la llingua asturiana, ente los que taba l'ATNL, con representantes de los partíos que formen el tripartitu: PSOE, IU y SOMOS.

Nesta reunión trasmitiose que'l Serviciu de Normalización n'Uviéu, tendría que tar al más altu nivel dientro del Conceyu pa evitar el so allugamientu nel ámbitu cultural pa fuxir de lo problemes qu’ello trai (plantegamientu diglósicu de la planificación llingüística, pocu marxe de maniobra pa garantizar la tresversalidá, etc...) y con un presupuestu dignu  col que poder desenvolver actuaciones que tengan como oxetivu la recuperación y normalización social de la llingua asturiana nel conceyu.

L'ATNL muestra'l so malestar por retrasu na puesta en marcha d'esti serviciu: "Yá pasaron dellos meses y lo que paecía asumío por tolos partíos políticos hoi tovía nun ye una realidá. Cada día que se pierde por trabayar na planificación del asturianu y del gallego-asturianu ye un día perdíu na recuperación de les llingües d’Asturies. Les coses, amás de paecer bones, tienen de selo y la única vía pa poder actuar na pérdida de falantes ye la creación del SNL nunes condiciones que garanticen la tresversalidá de les actuaciones y la estabilidá del propiu serviciu."

Axuntamos el comunicáu de l'Asociación de Trabayadores de la Normalización Llingüística alredor de la creación d'un SNL del Conceyu d'Uviéu