L'Asociación Amigos de Mieres reconoz a Nuberu con un conciertu nos sos actos d'aniversariu

Va celebrase nel Auditoriu de la Casa Cultura.

"Esti actu ye mui especial pa nós, yá que queremos, dende la nuesa asociación, rendi-yos un cariñosu reconocimientu, dao que la so trayeutoria, depués de 42 años de funcionamientu, va mui venceyada a la nuesa entidá, yá qu'ún de los sos primeros conciertos, cuando se llamaben Camaretá, foi entamada por Amigos de Mieres, y dende siempre hebo una mui candial collaboración y disposición mutua", espliquen dende'l recuperáu coleutivu que ta celebrando los cincuenta años de la so fundación. La cita va ser el vienres, a les 20 hores, con entrada a 5 euros.

Les persones que quieran facese con elles pueden pasar pel llocal de l'Asociación Amigos de Mieres (Valeriano Miranda, 11), de 17 a 19 hores; en Comercial Tuñón; nel Bar Entrecopas; y, dende mañana, na Casa Cultura. El conciertu de Nuberu nun ye la única actividá pol aniversariu programada pa esti abril, con un ciclu de cine decicáu a Luis Buñuel, una Xornada de la Memoria prevista pal día 14 nel cementeriu de Vegaotos, la charra-alderique 'Cincuenta años de economía en Mieres y Asturias' cola participación del profesor Juan Vázquez y l'economista Darío Díaz (día 16, IES Bernaldo de Quirós) y la proyeición d'un documental sobre'l Servicio Universitario de Trabajo (SUT) el día 25.