L'asociación de defensa de la fala "Xeira" presenta novedaes

L'asociación de defensa de la fala del Navia-Eo Xeira estrenó esta selmana la so web remocicada, ello coincidiendo con otres actualidaes rellacionaes cola asociación, que tamién va presentar d'equí a la vuelta de poco dos llibros mientres que continua cola so campaña pa popularizar el qu'a los neños de la zona se-yos pongan nomes en gallego-asturianu.

Amás de l'actualización de la so web institucional, l'asociación que preside Xabiel G. Menéndez tien yá pa dar a imprenta un volume compilatoriu de rellatos y una novedá na lliteratura na fala del occidente como va ser el primer llibru de l'autora d'El Franco María José Fraga Suárez (1964). Ello ye qu'anque Xeira tien una colección de poesía contemporánea eonaviega, hasta agora'l llabor editorial de Xeira na estaya de narrativa centrárase en recuperar autores clásicos de les lletres eonaviegues, siendo la primer vegada que se va asoleyar una obra de lliteratura narrativa contemporánea en fala por parte de l'asociación, dexando aparte los volúmenes d'estoyu de cuentos ganadores nel so certame de rellatos en gallego-asturianu.

Otramiente, Xeira sigue alantre cola so campaña "Xa pensache como ye has chamar?" cola que pretende facer un llamáu a que los padres de la fastera pa que-yos pongan nomes en gallego-asturianu a los sos fíos. Pa ello, nel cartafueyu en que se presenta la campaña apúrrese un bon llistáu de nomes, con formes eonaviegues como Llouguís Xuaquín, Bras, Crementina, Malia o Xuyán, nomes que puen ponése-yos a los neños o a quien quiera camudar el so nome pola forma equivalente en gallego-asturianu, pa lo que namás ye preciso acudir al rexistru civil con fotocopia del DNI y de la partida de nacimientu xunta con un certificáu d'equivalencia de la forma orixinal del nome y la equivalente en gallego-asturianu qu'espide la secretaría del Navia-Eo de l'Academia de la llingua o la Oficina de Política Llingüística del Principáu d'Asturies.