L'AS-15 va sufrir cortes el vienres y el miércoles al altor de Soutu

Van tener llugar ente les 13 y les 19 hores y van ser puntuales y de baxa duración.

La Conseyería de Mediu Rural y Cohesión Territorial avanza na execución de les obres d'ameyoramientu de la seguridá de la carretera AS-15. Los trabayos d’estabilización y aseguramientu de lladeres nel corredor del Narcea desenvuélvense a bon ritmu, llueu de realizar estudios xeolóxicos y llabores d'inspeición periódica con drones y equipos especializaos nes zones con mayor riesgu d'argayos.

En concreto, los llabores d’estabilización de la lladera na zona de Casa Enrique concluyeron güei y en Pilutuertu los operarios tán instalando una maya de triple torsión qu'obliga a caltener el pasu alternu reguláu por semáforos. No que respeuta al desprendimientu de Xavita ta previstu efeutuar trabayos de refuerzu na estructura de contención per aciu de la instalación d'una maya d'alta llende elástica y l'allugamientu de bulones na zona central p'asegurala a la roca.

Nel casu del argayu de Soutu, el que más afeutó a la carretera, la meyora de los trabayos d'aseguramientu de la lladera va obligar a facer cortes de tráficu puntuales de baxa duración mañana y el miércoles ente les 13 y les 19 hores pa dexar que los téunicos acometan trabayos de voladura y llimpieza del vial. Otra manera, el Gobiernu sacó a llicitación la meyora de dellos tramos de l'AS-15 ente Soutu los Infantes (Salas) y el puertu de Zarréu (Cangas) cola fin d'incrementar la seguridá, pa lo que se destinen 1.535.686 euros.