L'Arxentina, ¿base americana?

La crisis arxentina da pa escribir llibros enteros, y dende esti mediu ya fuimos apurriendo bien de links interesantes sobre la cuestión, pero la información que ta acabante de lleganos a la redacción paez más bien sacada d'una película d'espíes de cuando la Guerra Fría qu'una noticia d'actualidá. Con too y con ello, pa la parte más austral de l'Arxentina, tan bien preocupaos con ello.

Ello ye que'l Gobiernu de Tierra del Fueu, la provincia más al sur de l'Arxentina, cedió-yos tarrén a los EEUU pa que manguen ellí una base na que se fadrán esperimentos atómicos. Los promotores del alcuerdu anuncien que los esperimentos nun van tener aplicaciones militares, pero la cosa va enguedeyándose en lleendo esti artículu del 18 de xunetu del 2001 nel Financial Times de Londres, nel que se propón como salida pa la crisis arxentina el que'l país afaye la instalación de bases militares americanes a cambiu de condona-y la delda.

Nun hai demostrao nenguna rellación ente lo uno y lo otro, pero dende bien de colectivos sociales arxentinos denuncien qu'hai una presencia cada vegada mayor de los EEUU na política arxentina. La potencia del norte ta empeñada n'echar a andar l'ALCA (Aria de Llibre Comerciu d'América), un enfotu pal que nun escatimaríen en medios, y ye que tamién se denuncia qu'esti añu, según esti artículu de Le Monde Diplomatique, nes provincies de Salta y Entre Ríos hubo unos interesaos exercicios del exércitu norteamericanu. De momentu, el diariu arxentinu Página12 espubliza güei esti artículu nel que analiza les condiciones que pon l'alministración Bush p'ayudar al país sudamericanu.