L’Arribada convoca’l premiu "Timón" pa premiar trayectories lliteraries

L'Asociación Cultural l'Arribada dio anuncia ayeri nun comunicáu de prensa de la convocatoria del "Premiu Timón" col que la organización de la selmana cultural dedicada a la lliteratura asturiana que se fai dende l'añu 2006 en Xixón quier "facer reconocencia de la trayectoria lliteraria y/o'l llabor de promoción de la lliteratura asturiana". Pa ello l'asociación abre'l plazu pa la presentación de candidatures dende esti momentu y hasta l'1 de setiembre.

Les bases de la convocatoria manden que les candidatures puea presentales una persona o un colectivu, acutando que'l Premiu quier sirvir de reconocencia a trayectories bien llarges y que por ello, pa esta edición de 2007, namás opten al premiu los escritores n'asturianu que nacieren nel añu 1957 o primero d'esta fecha. Pal fallu del premiu la Xunta Directiva de l'Asociación Cultural l'Arribada va aconceyar un xuráu integráu por persones venceyaes a la cultura del país. El premiu va entregase en Xixón demientres la celebración de l'Arribada 2007, que d'otra manera ta pesllando yá la programación d'esti añu, nel que va pasar de seis a nueve díes de celebración, del 14 al 22 de setiembre.