L'Arena ¿una Marbella en pequeño?

El baxu Nalón, una parte d'Asturies de les que más tan acusando l'avieyamientu y la baxada de la población, alcontrose a primeros de los 90 con grandes proyectos pa convertir la desembocadura del antiguu ríu carboneru nun resorte turísticu cola conversión de San Esteban nun superpuertu deportivu y cola construcción, en dambes orielles, d'urbanizaciones residenciales arreyaes a esi puertu. Si el famosu proyectu de "Puertu Norte" sigue ensin terminase, y nestos años namás que se fizo un remocique de la barra'l puertu que nun igua los problemes pa la navegación, con accidentes mortales incluyíos, los axentes inmobiliarios sí que tienen el güeyu puestu nel llugar. Na oriella oriental del ríu, nel Pueblu de L'Arena, en conceyu de Sotu'l Barcu, ta previsto facer una urbanización d'apartamentos con bloques d'hasta ocho pisos en primera llínia de la mar, esfarraplando de pasu ún de los cañaverales más importantes del país nel qu'añeren delles especies de páxaros. L'Asociación de Vecinos tien puestu esti web especial sobre l'asuntu, y ta tamién pañando firmes contra lo que-yos abulta una gravísima agresión mediuambiental que, amás, va estrozar los recursos paisaxísticos, fonte de riqueza pal pueblu pol turismu qu'atraen.