L’Archivu de la Música Contemporánea Asturiana va compartir actuaciones y materiales de los últimos 50 años de la escena

Goxe Producciones y Mecigaya Creativa entamen el proyeutu Archivu de la Música Contemporánea Asturiana (AMCA), que va acoyer la web musicasturiana.com, perteneciente a la segunda. Ésti va nacer a partir de la bayurosa coleición privada de Xune Elipe, con materiales dende’l Surdimientu hasta güei, munchos d'ellos inéditos o desconocíos.

“El nuestru enfotu ye facer del AMCA una fonte d'información pa tou aquel o aquella que quiera desendolcar un trabayu sobre la historia o cualquier otru aspectu de la música d'espresión asturiana de los últimos 50 años”, espliquen los sos responsables. Cartelos, entraes, programes de mano, espublizaciones (fancinos, cartafueyos, revistes, etc.), pegatines, maquetes, conciertos, audiovisuales o semeyes van formar parte del mesmu, siendo muncho d'esti material inéditu o mui poco conocío.

El llibru 'La banda sonora de la oficialidá', asoleyáu pola Xunta pola Defensa de la Llingua Asturiana, foi un antecedente del proyeutu, que se va ampliar con aportaciones d'otros particulares, bandes, coleutivos o entidaes que quieran apostar y sofitar esti proyectu. Nestos momentos Elipe ta clasificando y catalogando’l so archivu, base del AMCA, que se va estrenar col conciertu entamáu nel 2004 nel Teatru Campoamor pol trentenu aniversariu de Conceyu Bable.

Avelino, Carlos Rubiera, Nel Xiblata, Nuberu, Rafael Lorenzo y Xulio Ramos, nomes importantes del Nuevu Canciu Astur, participaron nesta cita grabada nel so momentu, cinta que nunca vio la lluz. Una decisión que tien un calter mui simbólicu al ser el Surdimientu, el movimientu col que s’entama cola creación de Conceyu Bable, nel 1974, el periodu sobre’l qu’empecipia a trabayar l’AMCA.

Otros materiales que se van dir asoleyando son una grabación rexistrada na I Nueche Celta de Corao del añu 1983 –yá se fixéren públicos dellos momentos d'ella, pero non la totalidá de la mesma–, el I Festival de Música Asturiana d'Avilés del añu 1982 (con Trasgu, Xulio Ramos y Nuberu ente otros), la Nueche Folk d'Uviéu de 1993 (con Llan de Cubel y Capercaillie), la I Andecha Musical del 1978 (con La Turulla, Carlos Rubiera, Xulio Ramos y Manolín El Nietu Celo Xuan), el VII Día de la Cultura de 1979 (con Nuberu, Toni Ferrer –ex Vox Pópuli–, Güercu y el gallegu Emilio Cao), les entrevistes completes a los participantes na serie ‘D'ayeri a güei’ (emitida en TPA), materiales audiovisuales rescataes na fase de documentación d'esta serie –como un ensayu del grupu Asturcón, una actuación del grupu Güercu o una entrevista fecha a Alan Stivell na so primer visita a Asturies–, les entrevistes pa la ellaboración del llibru 'Llingua y Rock', maquetes d'una montonera de bandes qu'abarquen dende los años 80 hasta anguaño y cartelería de bien d'eventos rellacionaos cola música asturiana. Toos van tar a disposición de ciudadanos y estudiosos “que tean interesaos nel fechu musical asturianu y n'asturianu y/o gallego-asturianu” de manera llibre.

“La música d'espresión asturiana tien yá un volume, diversidá, calidá, repercusión y historia qu'amerita un proyectu como ésti y qu'ufiertamos a la sociedá asturiana”, camienten los sos responsables.