Lara nun descarta que Llamazares repita como voceru nel Congresu

El coordinador d’IX y candidatu a la presidencia del Gobiernu de la coalición, Cayo Lara, nun descarta que’l diputáu por Asturies, Gaspar Llamazares, repita como voceru nel Congresu. La formación d’izquierda quier ser la voz de la cai nel Parllamentu.
 
Sicasí, Lara tampoco niega la posibilidá de que sía él mesmu l’encargáu de falar nel Cámara baxa en nome del so grupu parllamentariu, una decisión que la formación va tomar “democráticamente” en feches próximes. Nuna intervención en TVE, un día depués de la cita coles urnes, el coordinador d’IX apostó pola movilización na cai y por ser la so voz nel Parllamentu frente a la "muria" de la mayoría absoluta del PP. "Vamos tar na cai, na movilización, coles asociaciones, colos sindicatos, en toes aquellas causes xustes, igual que tuviemos nesti tiempu", señaló, pa depués añadir que "el nuesu grupu parllamentariu va ser la voz de toes eses reivindicaciones que tán produciéndose na cai", un ceguñu nidiu a los indignaos.
 
El dirixente comunista atribuyó la medra d’IX, con 709.430 votos más nes xenerales pasaes hasta sumar 1.679.376 papeletes, al sofitu de "una parte importante de los votantes anteriores del PSOE, que se vieron defraudaos dafechu poles polítiques que fixo de dereches", asina como a parte del "voto de la rebeldía", en referencia al movimientu 15-M. “El bipartidismu perdió cuatro millones de votos", destacó, anque llamentó que con un sistema eleutoral “proporcional” la coalición podría tener agora 25 escaños. “Tán robándonos 14", sentenció.