L’aprobación de la toponimia tradicional de Caravia reduz a 5 los conceyos que queden por completar el procesu

Caravia l’Alta y Caravia la Baxa pasen a ser los nome oficiales de les dos parroquies que conformen Caravia. Esti conceyu conviértese nel númberu 73 en recuperar la so toponimia tradicional, polo que namái queden 5 por completar el procesu qu’arrancó nel 2005.

El Conseyu de Gobiernu aprobó’l vienres el decretu que declara oficiales los nomes de llugar tradicionales de Caravia, que van a entrar a valir una vegada espublizaos nel Boletín Oficial del Principáu d’Asturies (BOPA). Fechu pola Xunta Asesora de Toponimia depués d’un exhaustivu trabayu de campu, contó col preste del Plenu del Conceyu y pasó por un periodu d’esposición pública enantes de llegar al Executivu.

Prado ye la forma escoyida finalmente pa la capital del conceyu en llugar de ‘Prau’, recoyida nel Nomenclátor de l’Academia de la Llingua Asturiana. Mentes, los nomes de les dos parroquies son Caravia l’Alta y Caravia la Baxa.

Depués de completar el procesu en Caravia, entamáu nel 2006, namái queden 5 conceyos por finar el trámite. Son Somiedo, Cuideiru, Allande, Ibias y Navia.