“L’apreciu a lo propio nun nos ancla al pasáu, ye un formientu del progresu”, afirma Barbón

Adrián Barbón tomó posesión como presidente d’Asturies esti xueves nel patiu central de la Xunta Xeneral. El socialista emplegó nel so discurso l’asturianu y el gallego-asturiano, y na parte en castellanu aseguró que “l’apreciu a lo propiu nun nos ancla al pasáu; mui al contrario, ye un formientu del progresu en cualquier sociedá”.

L’actu contó cola asistencia de numberosos convidaos, rescamplando Isabel Rodríguez García, ministra de Política Territorial en funciones, en representación del Gobiernu estatal; Alfonso Rueda, presidente de Galicia; Alfonso Fernández Mañueco, presidente de Castilla y Lleón; María Chivite, presidenta en funciones de Navarra; y Emiliano García-Page, presidente de Castilla-La Mancha, que devolvió asina la visita de Barbón na so toma d’investidura. Tamién tuvieron presentes tolos ex presidentes del país vivos, Pedro de Silva, que-y punxo al llavianés la insinia que reciben los dirixentes del Gobiernu asturianu; Juan Luis Rodríguez-Vigil; Antonio Trevín; y Javier Fernández, decenes d’alcaldes y les alumnes y alumnos de la Escuela d’Asturianía.

“Empeño la mio pallabra con Asturies”, insistió en dellos momentos de la so intervención el presidente, que prometiera previamente na escalera de la Xunta Xeneral sobre l’Estatutu d’Autonomía y el títulu octavu d’una copia orixinal de la Constitución, cedida pa esta ocasión pola familia d’Emilio Barbón Martínez, baxo l’atenta mirada de Rodríguez García y Juan Cofiño, presidente del Parllamentu asturianu. “Asturies tiene la mio pallabra”, arrancó llueu de los saludos protocolarios, pa siguir con referencies a los suyos.

“A mía palabra fala de progreso porque el miyor porvir d’Asturias vai llabrarse sempre al célo aberto dos deretos y as llibertades, da igualda entre homes y muyeres, del respeto á diversidá”, siguió’l presidente cambiando al gallego-asturiano. “A involución, esa solombra moura, llóbrega y fría como úa entrada al pior pasao, nun vai marcar el rumbo del Principao. El goberno d’unidá progresista vai asegurar tanto a estabilidá como as reformas que señan necesarias pra manter Asturias nel camín das llibertades y os deretos llograos, da igualdá crecente, del desenvolvemento económico y del avance social”, afirmó.

L’asturianu pa falar d’economía y industria

Más alantre emplegaría l’asturianu pa dicir que “la mio palabra fala de la década del cambéu porque ye enforma lo qu’hemos facer. Va cuatro años coincidíemos en que’l gran desafíu d’Asturies yera la transición ecolóxica. Recuérdenlo: el retu aparentaba un cumal inconquistable. La industria, y con ella tol nuestru texíu económicu, acabaría por esmorecer y rindise. Güei, si volvemos la vista atrás, malapenes atopamos rescoldos d’aquel mieu. Agora non sólo tamos seguros de que vamos facer cume, sinón de que vamos tar ente los primeros”.

“Claro que nos queda camín, abondu trechu pendiente. Y por eso falo del 2033, que ye una fecha que s'escapa de la llende d’una llexislatura. Si proponemos rematar el cambéu económicu, aprovechar la conclusión de les grandes comunicaciones, entrar n’otra dimensión turística y frenar el descensu demográficu, nun podemos avanzar mirándonos los pies, acoxando a cada pasu. Faen falta ambiciones grandes y, con elles, lluces llargues. A la mocedá, que ye'l caudal del futuru, hai qu’abri-y tolos postigos, toles puertes de la esperanza, que sepan que trabayamos conxuraos pa qu’herieden la meyor Asturies”, continuó.

Darréu volvería al castellanu pa rescamplar el diálogu y l’arguyu, “arguyu de pertenencia porque acumulamos sieglos d’historia, una identidá tan reconocible como inclusiva, espresada nuna cultura propia y el llatíu, que queremos más vivu, de les nueses llingües”. Nesti momentu refirióse a la ventena d’alumnes y alumnos de la Escuela d’Asturianía, descendientes d’emigrantes: “Tái arguyosos de los vuesos oríxenes, cola mesma intensidá, difícilmente equiparable, que la siente la emigración, eses decenes de miles de personas que lleven Asturias per dónde quiera que van. Pídovos que lo tengáis siempre presente: l’apreciu a lo propiu nun nos ancla al pasáu; mui al contrario, ye un formientu del progresu en cualquier sociedá”.

Tamién comprometióse a defender los intereses d’Asturies con llealtá. “Éses son les pallabres d’ufrienda a la mio tierra: llealtá, arguyu, diálogu, cambiu, futuru y progresu. Con elles dispóngome a gobernar Asturies”, rescampló Barbón, que finó con un “¡Puxa Asturias!”.

Un presidente con esperiencia

Cofiño, novenu presidente de la Xunta Xeneral, foi’l primeru en tomar la pallabra nel actu. Na so intervención apuntó que “conozo bien al nuesu presidente, como seguramente la mayoría de vustedes saben. Disfruto y hónrame cola so amistá, que ye recíproca. A les sos reconocíes virtúes, el trabayu intensu, la honradez, empatía, cercanía y la firmeza na defensa d’Asturies, añaden vustedes agora la esperiencia adquirida nuna llexislatura difícil como nenguna”.

Pela so parte, Rodríguez García defendió na so intervención les autonomíes y llamó a fortalecer la diversidá y el pluralismu. “Cohesión pa compartir meyor esti Estáu, pa compartir eses competencies que tienen vustedes, les comunidaes autonómes, ameyorando los mecanismos de cooperación y collaboración con otres alministraciones, otres instituciones”, apuntó la ministra, que citó a Gaspar Melchor de Xovellanos pa desear “que con nuestru trabayu-y demos paz, tranquilidá y allegría” a les asturianes y asturianos.

L’actu finó cola interpretación del himnu nacional por Vicente Prado ‘El Praviano’, a la gaita, y la so fía Eva Prado, al tambor.

Na imaxe, Rodríguez García y Cofiño aplaudena Barbón depués de prometer el cargu. Semeya obra d'Armando Álvarez.