L'añu musical n'Asturies

Hoi queremos facer un pequeñu resumen de les noticies que tou esti añu espublizamos nesta sección, p'asina recordar un poco los acontecimientos más importantes na música asturiana esti añu.



Nesti resumen de xuro vamos escaecer daqué o a daquién, por eso pidimos perdón d'antemano a quién nun apaeza nestes llinies. Primero podemos echar una güeyada a los conciertos; n'Asturies pudimos disfrutar de conciertos en bien de llugares, la nueche de Xedré, los Alcuentros tradicionales de Trebolgu, la folixa na primavera de Mieres, la nueche de San Xuan en Corvera, el conciertu pola oficialidá de la Xunta Pola Defensa de la Llingua Asturiana, el conciertu n'apoyu de Radio Sele, dellos conciertos en Llanes La felguera, Xixón...etc. Estes esperiencies dexen bien claro que con un sofitu mayor y una política cultural adecuada estes iniciatives tienen muncho futuru.



Nesti añu tamién espublizáronse munchos discos, Carlos Rubiera, Jorge Méndez, "OI N'ast!", "Mus", "Australian Blonde", "Nosoträsh", Diego Pangua, "Col.lá Propinde", "Xemá", "Llangres", Flavio Rodríguez, Anabel Santiago, les bandes de gaites "La Raitana" y "Llacín" , "Dixebra" y "Nuberu" sacaron trabayu a la cai.



Esti tamién foi l'añu nel qu'un asturianu volvió a ganar "El Macallan", l'avilesín Rubén Alba triunfó en Lorient haya pel mes d'agostu. La banda de gaites "Llariegu" volvió a ganar el campeonatu nacional de bandes de gaites, ganó nes categoríes de meyor banda y meyor sección de percusión, amosando la so gran calidá.



Tamién tuvieron per Asturies figures internacionales del mundu del folk, Patrick Molard, "Wolfstone" "Shooglenifty", "Kornog", Jean Baron y Christian Anneix, "Luar na Lubre", "Dervish"...etc. Y grupos asturianos salieron d'Asturies, "Tejedor" tuvo per Canadá, "Llangres" n' Inglaterra y Italia, "Dixebra" y "Folkgando" en Francia, "Corquiéu" en Bretaña...etc.



Pero esti añu tamién tuvimos que despidir al cantante de tonada Tonín de Nembra, que morrió'l mes pasáu. Despidimos tamién a "Folkgando", que depués de dellos años buscando'l so sitiu na escena asturiana, decidió dexar los escenarios ya que'l númberu d'actuaciones que teníen nun pagaba les esfuerzu qu'ellos facien.



En resumen esti fue un añu nel que s'espublizaron munchos discos, munchos conciertos fueron un éxitu y van afitándose nel circuitu de conciertos asturianos. Pero la música asturiana tovía tien que dar un saltu en munchos ámbitos, meyorar les condiciones de la enseñanza de la música tradicional creando una política educativa adecuada, incentivar la profesionalización de los músicos asturianos, crear una industria al rodiu de la música asturiana....etc.



Pero l'añu que vien ya ta equí, d'equí a poco saldrá'l discu de "Los Gatos del Fornu", "Felpeyu" tamién va sacar discu nun mes o dos y "Llan de Cubel" sacará a la cai'l so direutu. N'Asturies.com tendrémosvos informaos de tolo que pase na música asturiana y deseámosvos una bona entrada d'añu.