L'Angliru más emocionante

La Vuelta Ciclista a España echó esti fin de selmana peles carreteres asturianes. Si el sábadu el rusu Smetanine remataba con trunfu d'etapa la escapada que caltuvo pela carretera antigua de la costa dende Ribesella hasta Xixón, ello nun foi más que la prestosa véspora pa la subida al Altu de l'Angliru. El míticu altu riosán yera la parte más dura d'una etapa que incluyía otros dos puertos de segunda categoría enantes de llegar al que se considera'l puertu más difícil del mundu, coles sos famoses ramples que lleguen a más del 20%. Pa más aquello, el nuberu acompañó a los ciclistes, que-yos cayó un bastiazu de los gordos subiendo l'altu, colo que, amás del esfuerzu, el fríu y l'agua, tamién tuvieron que facer equilibrios pa que les ruedes agarraren al suelu. Con esti panorama, la batalla del Angliru quedaba abierta pa los grandes de la Vuelta, porque los más de los corredores, que montaben desarrollos abiertísimos y hasta tres platos na bicicleta, bastante teníen con llegar arriba. Sabíase que yera la ocasión pa Roberto Heras. El meyor escalador del pelotón tenía la obligación d'atacar al líder Óscar Sevilla, pero colo que nun contaba esti yera con que tenía l'enemigu en casa. Cuando los dos amos de la vuelta taben tanteándose, Aitor González, compañeru d'equipu nel Kelme d'Óscar Sevilla, soltó un hachazu al que respondió Heras. Sevilla quedó claváu mientres el del US Postal acababa superando al corredor del Kelme, entamando una eshibición qu'acabó en llinia de meta. Tres d'elli, el vaciu y, yá distanciaos, un renacíu Joseba Beloki. Nin Aitor González nin Sevilla pudieron facer nada, y agora Sevilla ta a 1,08 d'Heras, que tampoco ye que tenga la vuelta ganada. Francesco Casagrande y Ibán Mayo, terceru y cuartu al final, tamién foron nomes destacaos nesti angliru del 2002La participación asturiana, tres la hecatombe de los nuestros corredores, quedó namás con Chechu Rubiera. El segundu d'Heras nel US Postal nun ta cuayando una vuelta curiosa, y ayeri, anque intentó aguantar de mano, acabó descolgándose y entró en meta a más de 10 minutos del nuevu líder de la Vuelta.La organización de la carrera destacó'l bon comportamientu de les más de 100.000 persones que vieron la carrera en directo dende les cunetes de la carretera a l'Angliru, solliñando qu'esti añu nun hubo los emburriones que tanto se denunciaron nel 2000. Sicasí,l'añu qu'entra nun va haber Angliru, porque la primer etapa de la Vuelta sal de Xixón y nun ye normal poner una etapa asina na primer selmana de carrera, asina qu'habrá qu'aguardar hasta'l 2004.

Contador Estadistiques