L’ALLA tresllada a Ciudadanos el so plantegamientu sobre la oficialidá de cara a una xunta colos sos dirixentes

“El clima foi mui bonu. Habrá diferencies, dende llueu, pero hai disposición a falar”, esplicó Xosé Antón González Riaño, presidente de l’Academia de la Llingua Asturiana (ALLA), tres aconceyar per segunda ocasión con José Luis Costillas, secretariu d’Aición Institucional de Ciudadanos. La institución treslladó-y los sos plantegamientos de cara a una xunta col coordinador Ignacio Cuesta y Susana Fernández Álvarez.

Nel alcuentru de trabayu celebráu esta mañana nel llar de l’ALLA Costillas aldericó y recibió documentación de mano de González Riaño sobre “el nuesu plantegamientu pa col procesu de la oficialidá y les midíes de política llingüística” acordies cola actual marcación llegal que fixa l’usu del asturianu, resume. Una información que va estudiar agora’l partíu de cara al futuru alcuentru con Cuesta y la vocera de la formación na Xunta Xeneral.

“Vi posicionamientos razonables, non maximalistes”, rellata’l presidente de la institución académica, qu’añade que “el clima foi mui bonu. Habrá diferencies, dende llueu, pero hai disposición a falar”. Agora, conociendo de primer mano “cómo entendemos nós la oficialidá”, el pasu siguiente ye la xunta con Cuesta y Fernández Álvarez “nel qu’afondar con más procuru nesta temática”.

Na semeya, Costillas y González Riaño.