L'ALLA trata nun conceyu con Convocatoria por Asturies "temes relevantes" en materia de política llingüística

El diputáu Xabel Vegas visitó'l llar de la institución académica pa caltener un alcuentru con Xosé Antón González Riaño.

L'Academia de la Llingua Asturiana (ALLA) recibió esta mañana al representante y voceru del grupu parllamentariu Convocatoria por Asturies, formación anguaño nel Gobiernu, "pa estudiar víes que valgan pa desenvolver l’usu del asturianu", detalló'l representante de Más Asturies na coalición que tamién conformen Izquierda Xunida (IX) y Izquierda Asturiana (IAS). Silvino Álvarez Rueda, xefe de prensa de la formación, acompañó a Vegas.

"Tratáronse temes especialmente relevantes en rellación cola política llingüística a desendolcar n’Asturies. Asina, coincidióse na necesidá de meyorar cualitativa y cuantitativamente la presencia del asturianu y l’eonaviegu na Radiotelevisión del Principáu d’Asturies (RTPA), afondando nes condiciones formales riquíes pa garantizar un porcentax equilibráu de les llingües dientro de les emisiones del ente públicu. De mou especial, falóse del contratu-programa, previstu nel marcu normativu de referencia", resumieron dende l'ALLA.

El presidente González Riaño apurrió a los representantes de Convocatoria por Asturies el documentu coles propuestes de la institución pa facer vidable’l plan de normalización previstu pol Gobiernu del Principáu d’Asturies, que l’Academia yá treslladare anteriormente al presidente Adrián Barbón y a la viceconseyera de Cultura, Política Llingüística y Deporte, Ana Vanessa Gutiérrez. La coalición, apunten dende l'ALLA, "comprometióse a estudiar el documentu y, nel so casu, a facelu de so, dientro de la dinámica del gobiernu de coalición".

A lo cabero, les partes aconceyaes alcordaron "siguir calteniendo alcuentros nos que s’afonde nel desarrollu efeutivu de la política llingüística n’Asturies".

Na semeya, Vegas y González Riaño.