L’ALLA recuerda que la propuesta de la FSA “nun tien precedente nos otros parllamentos con llingua propia”

|
Plenu Xunta Xeneral

“Vulnera l’espíritu de la norma aprobada pola propia Xunta Xeneral nesi sen y retuerce la sentencia del Tribunal Constitucional al respeuto”, asegura l’Academia de la Llingua Asturiana (ALLA). Énte esti fechu ensin "precedente n'otros parllamentos" y la situación colos títulos de certificación del idioma, sorraya “la necesidá urxente d'oficialidá”.

La propuesta de la Federación Socialista Asturiana (FSA), sobre la que los servicios xurídicos de la Xunta Xeneral van trabayar pa ellaborar un testu pa la so votación posterior por parte de los partíos, atopa la oposición de l’ALLA, que la ve “con esmolición”. “Per una parte, esti plantegamientu va contra la noción científica d’alta intercomprensión ente l’asturianu y el castellanu y produz un estrañamientu social de la llingua asturiana, inxustificáu dafechu, incluso ente les persones que nun la falen. Per otra, supón una escenificación inesplicable que va siguir comprometiendo la llibertá y la dignidá de les persones que quieran intervenir n’asturianu y n’eonaviegu na Xunta Xeneral”, apunta.

Asina, l’obligar a un diputáu qu’use estes llingües a tener que repetir la intervención en castellanu, que ye la que va quedar nel diariu de sesiones, o a apurrir un escritu cola traducción nel casu de qu'un diputáu diga nun entender lo que se ta falando, “vulnera l’espíritu de la norma aprobada pola propia Xunta Xeneral nesi sen y retuerce la sentencia del Tribunal Constitucional al respeuto, camudando lo qu’habría ser un éxitu pa la llingua nun fracasu na so xestión y aplicación”, considera la institución académica. “Lo que se propón pa la Xunta Xeneral nun tien precedente nos otros parllamentos autonómicos con llingua propia”, recuerda.

Soluciones

L’otru asuntu que ta creando indignación ye’l refugu de la Conseyería d’Educación d’incluyir el títulu de la prueba de certificación de nivel intermediu B2 adaptáu al Marcu Común Européu de Referencia pa les Llingües. L’ALLA “quier sorrayar la inconsistencia qu’implica la falta de reconocimientu” y “apremia a que los departamentos implicaos busquen y afiten una solución definitiva pa nun cayer na incoherencia de tar oficializando unos títulos axustaos al Marcu Européu de les Llingües pa dempués nun los reconocer nos rexistros” propios.

“Daes estes circunstancies, l’ALLA pide que se ponga en práutica con calter urxente la previsión constitucional del artículu 3.2 y l’encamientu del Congresu de los Diputaos, que yá alvirtió la necesidá d’entamar darréu’l procesu d’oficialización pa solucionar tolos problemes que, con cotidianeidá, amenacen los derechos llingüísticos de la xente que quier falar n’asturianu y n’eonaviegu”, afirma al entender que ye la única opción p’afitar la llibertá nel usu llingüísticu n’Asturies”. Poro, fai un llamáu a los grupos “que na Xunta Xeneral tienen manifestao la so posición favoratible a la oficialidá pa qu’actúen col máximu procuru nel camín de consiguir el mayor consensu posible que lleve a la reforma estatutaria y al llogru d’una oficialidá afayada a la realidá sociolóxica, sociollingüística y sociopolítica” del país.

Semeya obra de José Vallina.

Contador Estadistiques