L’ALLA queda un añu más ensin partida nos Presupuestos Xenerales

Les diferentes academies del castellanu, gallegu, eusquera y catalán reciben una aportación estatal que, quitando la RAE (1.661.290 euros), ye de 283.000 euros pa cada idioma. L’Academia de la Llingua Asturiana (ALLA), mentes, sigue ensin recibir partida nenguna de los Presupuestos Xenerales.

Iniciativa pol Asturianu lleva años demandando que s’igüe esta situación, ensin ésitu pola postura contraria del Partido Popular (PP), con mayoría absoluta hasta esta llexislatura. Toles enmiendes a los Presupuestos Xenerales del Estáu presentaes al respeuto refugáronse col votu en contra tamién d’UPyD.

El cambiu de repartu d’escaños abriría la posibilidá d’algamar sofitu a una posible enmienda pa que l’ALLA recibiera, al igual que les demás, una partida de los Presupuestos Xenerales del Estáu, polo que la organización que trabaya pola normalización del asturianu insiste nesta vía de financiación pa l’ALLA, entidá que sigue agobiada económicamente p’afrontar les nómines pese a que’l conseyeru Genaro Alonso anunciara’l día 4 que’l problema yá taba solucionáu. Según les cifres aportaes pola organización, l'Institut d'Estudis Catalans recibe 283.070 euros, al igual que la Real Academia Galega, mentes  que l’eusquera lleva una cifra mui asemeyada repartida ente la Euskaltzaindia (153.180) y la Eusko Ikaskuntza (129.900).