L’ALLA pon a disposición de los usuarios el númberu 13 de ‘Ciencies’

Yá ta disponible na rede, na plataforma REUNIDO de la Universidá d’Uviéu, el númberu 13 de la revista ‘Ciencies. Cartafueyos Asturianos de Ciencia y Teunoloxía’, que se presentó nes Xornaes Internacionales d’Estudiu de l’Academia de la Llingua Asturiana (ALLA). De calter añal, nesta edición dedícase la portada a los ‘Quesos d’Asturies’.

Cinco son los artículos qu’inclúi la espublización que tien al frente a Ana María Cano, como presidenta del Conseyu de Redaición, y a Carlos Lastra, como direutor, y que nació col oxetivu d’esperder na sociedá asturiana n’asturianu los avances y investigaciones científiques y teunolóxiques. El que pieslla la revista y da color a la portada ye ‘De la que tábemos faciendo un quesu...’, d’Ismael Marcet, Manuel Rendueles y Mario Díaz, del Departamentu d’Inxeniería Química de la Universidá d’Uviéu, mentes que’l primeru qu’atopa’l llector ye ‘Xuba na temperatura l’agua y cambeos na zonación de les algues nun pedreru del occidente asturianu (Campieḷḷos, Valdés)’, que firma’l biólogu Fabián Rodríguez López.

Sigue ‘Venti años del Xardín Botánicu Atlánticu de Xixón’, a cargu de Tomás Emilio Díaz González, caderalgu de Botánica, y ‘Efeutos de l’autonomía y la rexeneración en llacértidos’, obra de Irene Fernández Rodríguez, doctora en Bioloxía pola Universidá d’Uviéu. Completa esti númberu de ‘Ciencies’ el trabayu ‘El síndrome d’apnea del sueñu n’edá infantil’, pol médicu neurofisiólogu Xesús González Rato.