L’ALLA encamienta “a tar sollertes” énte los ataques “del más xabaz antiasturianismu”

Les XXXVI Xornaes Internacionales d’Estudiu yá tán en marcha, con delles ponencies y comunicaciones al rodiu la llingua asturiana hasta’l xueves. Na so inauguración, el presidente de l’ALLA, Xosé Antón González Riaño afirmó que “cuerren bonos tiempos pa la oficialidá”, pero encamentó “a tar sollertes”.

L’aprobación “solemnemente y con gran mayoría” del sofitu a la oficialidá nel congresu de la FSA, la recuperación próxima de la toponimia tradicional del Conceyu d’Uviéu y la presentación del borrador de la Comisión Especial d’Estudiu sobre'l Réxime de Proteición y Promoción del Asturianu, “que pide la reforma del Estatutu d’Autonomía pa pa reconocer la cooficialidá”, son dalgunos de los avances que citó González Riaño, qu’añadió que l’Academia de la Llingua Asturiana (ALLA) “va sofitar –yá lo ta faciendo– y con tol compromisu, estos entamos, pero tamién encamienta a tar sollertes. Siempre que ye posible un llogru pa la llingua surde’l más xabaz antiasturianismu pa intentar torgalo. Tamién agora pasará, de xuru. Poro, hemos tar atentos p’actuar con convicción, democrática y intelixentemente, pa rispir pol futuru del nuesu idioma; un futuru que pasa irrenunciablemente por una oficialidá próxima”.

El presidente de l’ALLA tuvo acompañáu na inauguración de les XXXVI Xornaes Internacionales d’Estudiu por José Ramón Obeso, vicerrector d’Investigación de la Universidá d’Uviéu, que s’encargó de presentar l’actu; José Antonio Gómez Rodríguez, decanu de la Facultá de Filosofía y Lletres, sede de l’actividá; y Carlos Lastra, direutor de la revista ‘Ciencies. Cartafueyos Asturianos de Ciencia y Teunoloxía’. El primeru en tomar la pallabra foi Gómez Rodríguez, que faló del compromisu “pa cola llingua y cultura asturianes” de la Facultá de Filosofía y Lletres “como nun podía ser d’otra miente”, asina como l’aportación “de recursos humanos y materiales” de la Universidá d’Uviéu “al estudiu de la llingua y lliteratura asturianes”.

D’igual forma, destacó la contribución “al saber universitariu”de les xornaes, “frutu d’una llabor coleutiva, que dende hai más de trenta años alluma, como si un faru se tratase, sobre la costa de la cultura asturiana”. Darréu, González Riaño presentó los conteníos del númberu 117 de la revista ‘Lletres Asturianes’, na so edición dixital, que va siguir dirixida por Ana María Cano, pa depués dar pasu a Lastra pa facer lo propio col núberu 7 de ‘Ciencies’, que nesta ocasión lleva en portada la problemática de les plantes invasores.

Obeso encargaríase de pesllar l’actu y declarar la inauguración de l’actividá apuntando que la Universidá d’Uviéu “tuvo siempre comprometida col sofitu al desendolque y difusión del asturianu, tanto na docencia como na investigación”, emponderando la ufierta académica pa formar al profesoráu y los trabayos de proyeición internacional nel campu investigador.

Segunda xornada

Sonia Barnes, de la Marquette University (Milwaukee) va encargase mañana d’abrir les ponencies y comunicaciones a les 16 hores cola conferencia ‘Un análisis acústicu de la metafonía asturiana’. Darréu, dende les 17 hores, van intervenir Florencio Friera, Antón Caamaño, Xosé Nel Comba, Xuan Xosé Lajo y Carmen Muñiz Cachón, pa zarrar la segunda xornada Marcos Rodríguez Álvarez, de la Universidá d’Uviéu, con ‘¡Bable nes escueles! Averamientu hestóricu-políticu a la vindicación de la escolarización de la llingua asturiana’, dende les 18.45 hores.

Na semeya, Lastra, González Riaño, Obeso y Gómez Rodríguez.