L'ALLA edita'l 'III Estudio Sociolingüístico del Navia-Eo' de Llera Ramo

La encuesta fíxose ente'l 10 y el 24 de mayu del 2021 nos 18 conceyos del occidente.

La llibrería de l'Academia de la Llingua Asturiana (ALLA) incorporó va poco los datos definitivos de la III Encuesta Sociollingüística del Navia-Eo fecha por Francisco José Llera Ramo. El llibru entitúlase 'III Estudio Sociolingüístico del Navia-Eo (2021). La recuperación del eonaviego'.

El caderalgu de Ciencia Política de la Euskal Herriko Unibertsitatea y académicu, responsable tamién de la ellaboración de les dos anteriores, feches nel 1990 –primera entamada n’Asturies, encargada pol Gobiernu, pero non espublizada– y nel 2002, dio un avance de los datos xusto güei va un añu, rescamplando que l'idioma taba nun "claru procesu de recuperación". Éstos afitaben qu'un 75 por cientu los habitantes del Navia-Eo consideraba que la fala eonaviega merez el mesmu tratu que’l restu d’idiomes del Estáu o qu'un 47 por cientu sofita la oficialidá de la so llingua por un 36 que diz refugala, ente otros munchos.

Agora ye posible consultar la encuesta al completu nesta obra editada pola propia ALLA.