L’ALLA cumple 40 años y celébralo cola espublización d’un informe que recueye’l so llabor nesti tiempu

El 15 d’avientu del 1980, el Conseyu Rexonal d’Asturies, la institución preautonómica, creaba al traviés del Decretu 33/1980 l’Academia de la Llingua Asturiana (ALLA). Cuarenta años depués, la institución, fundamental nel procesu normativu del idioma, celebra les sos cuatro décades de vida asoleyando l’informe ‘Academia de la Llingua Asturiana: 40 años de compromisu con Asturies y la so llingua’.

“La creación de la institución académica pue entendese como ún de los llogros de Conceyu Bable, gracies a la sensibilidá asturiana d’Atanasio Corte Zapico, conseyeru de Cultura del Conseyu Rexonal, que punxo les bases pa la creación de l’Academia de la Llingua Asturiana n’avientu de 1980 y que fore posible, llueu, baxo’l mandatu del so sustitutu Rodrigo Artime”, espresa la institución nuna nota. “Foi yá nel añu 1981, cuando’l muérganu plenu del Conseyu Rexonal d’Asturies da’l preste a los estatutos de l’Academia de la Llingua Asturiana (Decretu 9/1981, de 6 d’abril). El 16 de mayu d’esi añu celebróse la primer Xunta de l’ALLA colos miembros escoyíos per parte del Conseyu Rexonal y procedióse al nomamientu de cargos”, recuerda darréu.

Cumplir col so mandatu estatutariu foi siempre’l so oxetivu, poniendo a disposición de toles asturianes y asturianos les ferramientes normatives básiques, esto ye, les normes ortográfiques, la gramática y el diccionariu, y fomentando la investigación sobre l’idioma. D’igual mou, nesti tiempu miró pol estatus social de la llingua y los derechos llingüísticos de la ciudadanía.

“Esto ye daqué que l’ALLA siguirá faciendo, güei y nel futuru, p’avanzar, per un llau, na estandarización de la llingua asturiana y, per otru llau, nel llogru de los nuesos derechos llingüísticos. Esto ye especialmente importante si nesta llexislatura, como esperamos, la reforma del Estatutu d’Autonomía inxer la cooficialidá de la llingua asturiana y del eonaviegu nel so articuláu. Esti nuevu contestu nun camudará l’actividá académica en cuantes al cumplimientu de los estatutos, sinón que pondrá nel centru del so llabor nuevos retos y xeres pa facer vidable la normalización social de la llingua histórica del pueblu asturianu”, asegura.

Pa celebrar esti cuarentenu aniversariu, la institución académica espublizó esta mañana l’informe ‘Academia de la Llingua Asturiana: 40 años de compromisu con Asturies y la so llingua’. Nél recuéyese’l llabor que vieno faciendo l’ALLA nestes cuatro décades en cumplimientu del so mandáu estatutariu, “esto ye, la codificación ya investigación de la llingua asturiana, asina como’l papel tutelar de los derechos llingüísticos de los asturianos”.