L’ALLA convoca les ocho categoríes del Certame d’Investigación y la Olimpiada Escolar

Ocho de los diez concursos qu’entama l’Academia de la Llingua Asturiana (ALLA) yá abrieron el plazu la recoyida de trabayos. Son los que componen el Certame d’Investigación, mentes que los dos de la Olimpiada Escolar Urbano Rodríguez, el de Primaria y el de Secundaria y Bachilleratu, van entamar coles inscripciones nel mes d'ochobre.

Con un máximu de 1.500 euros a repartir por caún d’ellos, un primer premiu de 600 y un posible reconocimientu especial de 300 “cuando’l volume de la obra distinguida col primer premiu perpase les desixencies cuantitatives mínimes”, y dos accésits de 300, el Certame d’Investigación recuperáu l'añu pasáu trata diferentes temátiques. En concreto los concursos “pa trabayos fechos n’asturianu o eonaviegu” son el de recoyida de material toponímico oral; el de recoyida oral de léxicu asturianu; el de propuestes de terminoloxía especializada; el d’investigación llingüística o lliteraria; el Xosé Bolado de recoyida de material lliterario inédito anterior a 1970; el de divulgación de teunoloxía y ciencies naturales; recoyida, trescripción y estudiu de testos orales; y el de documentalismu sociocultural curtiu.

El plazu pa presentar los trabayos fina’l 31 d’ochobre. Éstos han entregase nel llar social de l’ALLA, en mano o per corréu certificáu, en formatu CD o DVD regrabable o nun USB xunto con una plica colos datos.

La clasificación, el 17 de payares

La Olimpiada Escolar Urbano Rodríguez divídese, mentes, en dos categoríes: Primaria, y Secundaria y Bachilleratu. Pueden participar tolos centros escolares del país al traviés de les maestres y maestros de Llingua Asturiana o Gallego-asturiano, qu’han formalizar la inscripción.

Les alumnes y alumnos van participar na clasificación, a distancia, programada pal 17 de payares a les 10 de la mañana, con una redaición sobre un tema propuestu pola organización nesi momentu. El profesoráu va ser l’encargáu d’escoyer a los merecedores d’acudir el 20 d’avientu a la final presencial n’Uviéu.

Los ganadores van recibir material escolar, llibros y un elementu conmemorativu. Tolos participantes van llevar como recuerdu un diploma.

Na semeya, llibru a partir del trabayu ''Averamientu a la caracterización del asturianu de La Güeria Carrocera (Samartín del Rei Aurelio)', col que ganó Claudia Elena Menéndez Fernández el Concursu de Recoyida, Trescripción y Estudiu de Testos Orales del añu pasáu con premiu especial.