L'Alcuentru Folclóricu n'Ayer d'El Gumial conviértese nel FolkAyer

El certame da un pasu más al algamar dimensión internacional, con presencia de los bretones Startijenn y los escoceses Elephant Sessions.

La octava edición del Alcuentru Folclóricu n'Ayer conviértese en FolkAyer. Ye'l nome escoyíu pola Banda Gaites El Gumial y el Conceyu d'Ayer pa esta nueva etapa d'unes xornaes que pretenden ser "un festival imprescindible nel mundu folk asturianu".

Dende mañana y hasta'l domingu van desenvolvese en Morea trés xornaes que van contar con un alcuentru de bandes de gaites, conciertos, un mercáu celta y delles actividaes más. La carpa principal de la folixa va asitiase nel Nuevu Aparcamientu de Sotiello, frente al Polideportivu Municipal, con aparacaderu pa visitantes habilitáu nel Complexu Cívicu Deportivu de Caborana.

L'apertura del mercáu ta prevista pa les 17 hores mañana y al meudía sábadu y domingu. A les 19 hores va ponese un taller de baille astur-bretón, a les 21.30 hores un desfile d'antorches dende'l campu Morea y, pa pesllar la xornada, los conciertos de La Banda Latira, Alienda y Startijenn, "banda referente de la música bretona", dende les 22.30 hores.

Alcuentru de Bandes de Gaites

El sábadu va tener llugar a les 18 hores l'esperáu Alcuentru de Bandes de Gaites, nel que van participar la Banda Gaites Villaviciosa-El Gaitero, la Banda Gaites Castrillón, la Banda Gaites Conceyu Llangréu, la Banda Gaites Escolinos d'El Gumial y la gallega Escola de Gaitas de Ortigueira. Enantes, a les 16.30 hores, toes van protagonizar un pasucais.

Pela nueche, a les 22.30 hores, va arrancar el conciertu del día cola Banda de Gaites El Gumial. Depués van xubir al escenariu Algaire, pa siguir Elephant Sessions, grupu escocés "con una propuesta que combina folk, funk y música electrónica".

La xornada final va contar con bandines per Morea dende'l meudía. A les 14.30 hores va entamase una comida asturiana con pote, con vales a la venta a 15 hores, y pela tarde, a les 18 hores, una Amuesa d'Asturianada con Álvaro Fernández Conde, Liliana Castañón y Paula Prieto, col acompañamientu a la gaita de Fonsu Les Regueres.

Autocar nocherniegu

La xente de fuera de Morea que quiera escaecer el coche pa desplazase al FolkAyer va poder facer usu del autocar nocherniegu que va funcionar mañana y el sábadu pa contra Mieres y Felechosa hasta les 3.30 hores. La parada va ser enfrente la carpa principal de la folixa.