L'alcuentru de bandurrieros llega a la so 8 edición

L'Asociación de Folclor Tradicional La Quintana, celebra'l próximu sábadu día 30 d'abril del 2005, el 8 º Alcuentru de bandurrieros, en Caliao, conceyu de Casu.

L'alcuentru de bandurrieros que tradicionalmente vien organizando dende l'añu 1997 l'asociación de folclor "La Quintana" llega a la so octava edición, que va tener llugar esti sábadu día 30 d'abril en pueblu de Caliao, en conceyu Casu, un llugar onde l'alcordanza d'esti instrumentu emblemáticu n'otra dómina del folclor asturianu y anguaño menguáu a la mínima espresión caltiense mui viva. Como n'ediciones anteriores del alcuentru, va poder visitase nel salón de les escueles dende pela mañana una amuesa d'instrumentos y una esposición sobre l'ámbitu musical de los mesmos, anque los actos importantes van entamar a les 6 de la tarde, onde va presentase con un audiovisual y a cargu del so autor, Daniel García de la Cuesta, el llibru La bandurria y el rabel, del que yádieremos anuncia n'Asturies.com y nel que s'espeyen investigaciones inédites feches sobre estos instrumentos.

Darréu de la presentación del llibru va dase pasu a un conciertu nel que van intervenir los músicos Alberto Jambrina, de Zamora, Daniel García de la Cuesta, d'Asturies, amás d'otros músicos convidaos. L'alcuentru de bandurrieros coincide tamién cola fiesta local de la Santa Cruz, qu'inclye actividaes como la puya'l ramu, un mercáu tradicional y una verbena de nueche.
Pa más información la organización apurre'l teléfonu teléfonu 626511863 y una dirección de correu electrónicu.