L'alcordanza d'Ígor y Carlos va revindicar la música asturiana

Los númberos d'esti conciertu son los propios que la ocasión merez, dos escenarios, decenes de grupos y cientos de músicos, que van actuar col oxetivu primero de nada de recordar a los desaparecíos miembros de Felpeyu Ígor Medio y Carlos Loco, pero tamién col envís de revindicar la bayura y calidá de la música asturiana, y como ésta y los que la faen vense munches vegaes trabayando en condiciones llamentables dafechu, o güérfanos d'unos sofitos institucionales y privaos que sirvieren d'encontu d'una xera tan prestora a la par qu'abegosa como ye facer música. Magar de la cantidá de participantes, a la organización fízose-y bien difícil iguar el cartel ya que tuvieron que dexar dalgunos grupos fuera. Y ye que plantégase que nel conciertu tean músicos o grupos que tuvieren rellación colos dos artistes desaparecíos, y l'enorme llabor desenvueltu por Ígor y Carlos llevólos a ser partícipes de milenta proyectos musicales que ye imposible xubir a un escenariu nuna nueche. Asina que puede decise que son toos los que tán, pero nun tán tolos que son.

L'esquema d'actuciones del conciertu plantega per un llau actuaciones de grupos que tuvieron rellación d'una manera o d'otra con Ígor y Carlos, y per otru, l'actuación de bandes feches ad hoc pal festival onde tocarán músicos rellacionaos colos dos fallecíos. Asina nel escenariu de folk, denomáu "Ígor", van tocar Gatos del Fornu, La Bandina'l Tombo, Tejedor, N'arba, Llan De Cubel, Corquiéu y por supuesto Felpeyu. Arriendes d'estes bandes tamién va tar un señaldosu Felpeyu nel que van tocar componentes antiguos del grupu nuna formación llamada Felpeyu's Old Stars colos hermanos Cástor y Félix Castro, Elías García, Isidro Suárez, Toño Gómez, Xel Pereda, Dudu Puente y Ruma Barbero. Otra de les bandes iguaes pa la ocasión va ser la formada por Toli Morilla, Xurde Fernández (Blima), Rubén Bada (DRD), Flavio Rodríguez (La Raitana) y Antón Barquero (Ciquitrinos, Llanzones). La cabera formación folk va xuntar tamién nomes hestóricos del folk asturianu como son Ramón Prada, Chus Pedro (Nuberu), Fonsu Fernández (Lliberdón), Edi Word, Lorena García (Gatos del Fornu), Indalecio Santos (Ciquitrinos, Llanzones), Pedro Pangua (Ubiña, Xaréu) y Manolo Durán (Tambor de la Abadía).

Nel escenariu de rock, que va recibir el nome de "Carlos", la esbilla de músicos y grupos tamién ye de primer nivel. El próximu 22 de xunu van poder sentise a bandes como Los Huracanes de Montiana, Lucas y Los Patosos, Mamy Carter, Holiday Fleet, Sangrientos con Miguel Fuentes (The Amateurs) o Edwin Moses. Cono nel escenariu folk, tamién va haber formaciones especiales con músicos de grupos de pop y rock de los 80 y 90, como Los Manguanes con Santi Menéndez (Últimos de Filipinas, Decididos), Julio Suárez (Néctar, Asociados), Nacho Villaverde (Néctar, V Columna), Luis Riestra (Decididos), Ricardo García (Lliberdón, Decididos), Rafael Fano (Últimos de Filipinas), Tino Acebal (Equos). El conciertu na so parte rock va finar colos músicos de Los Locos tocando los temes de la banda cola collaboración d'amigos y aquellos que fueron en dalgún momentu componentes del grupu como Paco Loco, Juanjo Mintegui, Marcos Díaz, Salva López, Jaime Beláustegui, Félix Morales, Chus Naves, José Ramón Feito.