L’alameda del Porcía abraza un añu más el meyor folk

|
Alameda de Porcía

La decana de les nueches celtes asturianes, la Noite Celta de Porcía, llega a una edición nueva, la trentena cuarta. La perguapa alameda del llugar yá ta preparada p’acoyer les actuaciones de la Banda de Gaitas Marino Tapiega, Naheba, Corquiéu, Albastur y Dixebra.

Esti sábadu llega ún de los momentos más esperaos del añu pa los aficionaos a la música folk. Celébrase la Noite Celta de Porcía y, como ye vezu, ésta trai un cartelu acorde a les espeutatives.

Dende Tapia va acudir la Banda Gaitas Marino Tapiega, mientres que del oriente va llegar Corquiéu, de xira pol so venti aniversariu, y d’Avilés otra banda que ta de celebración, Dixebra, nel so casu polo sos 30 años sobre los escenarios. La representación de fuera va correr a cargu de los cántabros Naheba, mientres que completa les bandes d’esta edición Albastur, intercambiu musical ente Asturies y Escocia nel que participa Anna Wendy Stevenson y Simon Bradley.

L'alameda de Porcía yá ta preparada p'acoyer a los munchos asistentes que se desplacen a esta población del occidente del país a disfrutar de la música y del bon ambiente de la folixa, amás de les riques sardines que la organización prepara tolos años.

Contador Estadistiques