L'alameda de Porcía, preparada p'acoyer la Noite Celta

Esti sábadu celébrase una edición nueva de la Noite Celta de Porcía, la trentésimu tercera, na espectacular alameda del llugar. La Banda Gaites LaKadarma, Caldo y Os Rabizos, Felpeyu, Fraser Fifield Quartet y Spanta la Xente conformen el cartelu d'esti añu.

La decana de les nueches celtes del país nunca defrauda y son munchos los aficionaos a la música folk que tienen esta fecha marcada nel calendariu. Asina, l'alameda de Porcía ta preparada p'acoyer a los munchos asistentes que se desplacen a esta población del occidente del país a disfrutar de los meyores grupos de la escena y del bon ambiente de la folixa, amás de les sardines que la organización prepara tolos años.

La Banda Gaites LaKadarma encargaráse d'abrir les actuaciones pa depués dar pasu a la banda de la zona Caldo y Os Rabizos y a Felpeyu, qu'esti añu cumple un cuartu de sieglu de vida. El toque internacional va ponelo la banda astur-escocesa Fraser Fifield Quartet, mentes que Spanta la Xente va zarrar la nueche.