LaKadarma entama una collaboración coles escueles de Piloña pa caltener la memoria cultural del conceyu

|
Banda de Gaites LaKadarma

‘El Rebuscu de Piloña’ ye’l nome del proyeutu entamáu pola Banda de Gaites LaKadarma col oxetivu de recuperar y caltener la memoria cultural de Piloña, conceyu onde ta asentada. Trátase d’una collaboración colos centros educativos del conceyu nel que participen activamente los escolinos y les families.

Al traviés d’una encuesta repartida peles trés escueles piloñeses, L'Ablanu (L'Infiestu), El Plaganón (Sebares) y Julio Rodríguez Villanueva (Villamayor), y l’IES de L’Infiestu, la banda de gaites entruga sobre la esistencia d’instrumentos vieyos en casa, sobre cantantes y músicos que conocieren o la esistencia de semeyes o grabaciones d’ellos. D’esta forma quier rescatar testimonios y materiales que, nel casu contrariu, puedan quedar nel escaezu o nun salir de les paredes de los llares.

“Con esti proyectu LaKadarma pretende abrir una estaya de collaboración colos centros educativos de Piloña pa promover actividaes venceyaes a la cultura tradicional asturiana”, espliquen. La encuesta tamién ta abierta a tolos ciudadanos de Piloña y la contorna na web de l’agrupación nel so enfotu por conocer y caltener la memoria cultural de la zona.

Na semeya, miembros de LaKadarma'l branu pasáu nuna salida pa tocar pel conceyu.

Contador Estadistiques