L'Agüeria Samuño va recuperar el so ferrocarril mineru

El Conseyu de Gobiernu d'Asturies aprobó ayeri un conveniu col Institutu pa la Reestructuración de la Minería del Carbón y Desarrollu Alternativu de les Cuenques Mineres pol que va llevase alantre'l proyectu d'ecomuséu de L'Agüeria Samuño, presupuestáu en 6.500.000 euros. El proyectu consiste na recuperación del antiguu ferrocarril mineru del valle que, n'acabándose les obres, va facer un recorríu turísticu rematando nel centru del Ecomuséu que va ser el pozu San Luis de La Nueva, ún de los más importantes dende'l puntu de vista históricu-artísticu de too Llangréu. Inauguráu en 1928 pola empresa Carbones La Nueva, el San Luis supunxo la entrada na modernidá de les antigües mines de monte del valle de La Nueva. El San Luis tuvo sacando carbón hasta 1969, pasando darréu a funciones de caltenimientu y auxiliares del pozu Samuño hasta'l so pieslle definitivu nel 2002.